Ich wolfker wasner. anna mein hausfraw. mit allen vnsern erben vnd Chunrat vnd Heitweig vnd Rainolt vnd Nicla de wasner sein pruder. veriehen offenbar mit dem prief vnd tunn kchunt allen, de den prief an sehent oder lesen hoerent, Daz wir mit wolpedachtem mut vnd sammung vnser pesten freunt rat. czu der zeit, do wir iz wol tun machten, recht vnd redleich ze kchauffen haben geben vnser czehent, de wir ze lehen haben gehapt von dem ersam fursten dem Apt ze Seydensteten. von erst halben czehent auf der mul cze sperkchsteten gelegen in Seydensteter pharr vnd auf ainer hofstat, de haizzet in dem kchaet, auf ainer hofstat in dem Gruntlas, auf ainer hofstat in dem darnreith. gelegen aspekcher pfarr, de czehent kchlain vnd grozzen. mit allen den rechten, alz zehentes recht ist. Chunraten dem wiser. seinen erben vnd allen seinen gabern (?) vmb saechs pfunt pfenning wienner munzz vnd vmb dreizzik pfenning. der er vns gancz vnd gar gebert hat. Also ob daz wer, daz im dhain kchrieg auf stund mit recht von dez zehentes wegen, daz wir im daz auz richten vnd fur in sten an gefer. Taet wir dez nicht, waz er dann dez schaden nem, dez selben schaden schol er von vns pekchomen. vnd von aller vnser hab, wo wir de haben. mit vnserm gutleichem willen. Dar vber geb wir im den offen prief versigelt mit meinem wolfkern wasner anhangunden insigel. vnd meiner pruder Hartweiges vnd Niclas der wasner anhangunden insigel. vnter den jnsigeln ander vnser pruder verpintent. de aigens jnsigel nicht habent. allez daz staet pehalten. daz vorgeschriben stet. Der sach ist zeug fridreich macz. mit seinem anhangunden jnsigel. im an schaden. Der prief ist geben nach Christes purd dreuczehen hundert iar dar nach in dem dreund sechczkisten iar. an sand Margreten tag.

Source Fulltext: RAAB, Seitenstetten (=FRA II/33, Wien 1870) S. 244-245