Wand ellev dinch auf dirre werld weilwoertich vnd zergaenchleich sind vnd nicht beleibet, nur daz man durch der Sel willen hin fur hincz Got sendet. Da von vergich Ich Chunrat von Alindorf weilen Purchgraf datz Sevsenekk. daz ich ze der zeit, do ich daz wol getven moht vnd alle meine sinne wol pei mir macht gehaben, mit Hern Walthers vnd Jansen meiner Svn vnd mit anderr aller meiner Erben guetleichem willen, vnd mit wol verdachtem muet alles mein dinch geschaffet han, als an meiner lesten weil an selgeraet vnd an andern allen mein Sachen, als ich pest gedenchen macht. Des ersten han ich geschaffet vnser vrowen gotshaus vnd Samnung hincz Paumgartenperg, da ich erwelt han ze ligen mit meiner begrebnusse. mein Pestez Ros, daz ich ze der weil han vnd allen meinen Harnasch, wie der benant ist. Vnd han auch dahin gewidmet meins vreyn chauf aigens daz guet daz Chraynperg, daz mein vnd vroen Gueten Selig meiner hausfrowen, der got genad vnd allerr vnser vordern mit einer messe in dem Chloster gedacht werd, als mir daz mit priefen bestetiget ist. Dar zv sol man an dem ersten tag meiner bestatnusse tailen armen levten vor der Porten vnd hin furbaz ewichleichen an meinem vnd der vorgenanten vrov Gueten meiner hausfrowen mit ein andern am jartag prot von ainem Mut chorns, fleisch von einem pachen, wein vom fumf embern, als ich denselben wein mit chauf von dem Chloster zegeben bestetiget han, vnd dos selben tags sol man der Samnung geben in das Refent ein phunt phennig zu einem vollen dienst. Darnach han ich geschaffet vor allen dingen innerchleich durch got vnd durch aller meiner vordern Sel willen zv der steiftung vnserr vrowen Cappellen vnd Sand andres dacz wunneberch ledichleich daz guet meins vreyen chauf aigens, watz ich datz Molendorf von Praunne dem Sazzer gechauffet han, swie daz benant ist auf weingart dienst, an wein an phennig, an getraid oder a swev ez ander sei, versuecht oder vnuersuecht, daz sol der Cappellan alles haben ze rechter widem gelt der Chapeln vnd ze einem ewigen sel geraet vnuersprochenleich. Darnach han ich geschaffet meiner Tochter Elspeten hincz Tiernstain zwai phunt geltes. Meiner Tochter hincz Peunden Annen zwai phunt gelts. Meiner Tochter Chunngunden vnd irrn chinden daz guet datz Pruch ledichleich. waz ich da gehabt han, da Sechs man aufgesezzen sind. Meinen eninchlein datz Leutzmanstorf die Mul in der Awe, die da pei leit vnd ein hofstat datz Hermanstorf. vnd ein lehon, daz haizzet datz Chunraten in dem Raeut enhalb der ybs. Meinen eninchlein den Gerwern ein Lehen datz Perngerstorf vnd daz guet, daz do haizzet datz Goetfriden in der Hueb, Meinen eninchlein datz woching den Hof datz Looe, Ruesseins chinden zehen phunt phennig. Chunczen Eysenhart zehen phunt phennig, Elspeten chindern datz Stephanshort zehen phunt phennig. Hincz Seitensteten den zehent pei Oed, den ich von danne han gehabt ze lehen, der sol dem Gotshaus ledig sein durch meiner Sel willen. Hintz Svndelburch vnd hincz Oed den zwain chirchen ein halbes phunt phennig gelts ietweder chirchen sechzich phennig ewichleich ze dem Licht. Hintz Ardacher in daz chloster an daz Licht sechzich phennig ewichs gelts. Ich han geschaffet hintz allen Pharrenchirchen niderthalbe der Ens zwischen der Tavnav vnd der waldmarch gegen Seitensteten vber vnd hincz sand Gorigen pei Amsteten igleicher chirchen ein phunt beraiter phennig. Dar vber han ich geschaffet, daz mein Erben an alle wider red, als si mit irren trewen mir daz verhaizzen habent an alle irrung von alle dem guet, daz ich von Got ze lehen han gehabt, ez sei an [204] vrbar oder an varndguet, daz ich in lazze beschaidenleich mit zwain hundert phunt phenning nach Peichtiger vnd nach gueter frevnde rat ablegen schullen, wo sev geweist vnd inne werdent mit der gewizzen, den ich des schuldig pin abzelegen, die ich||
beswaret han, wie daz geschehen sei. vnd auz den selben zwain hundert phunt phennig schullen sev nach meinem tode inner Iars vrist ein piderben man recht vnd redleich vertigen ze dem heiligen Grab vnsers herren vber Mer fur alle mein Saumung, die ich auf dirre werld han begangen. Darvber schaffet ich von ander mein guet, daz mein erben schullen meiner Sel ze hilf ein Romvart vnd ein Achvart hintz vnser vrowen vnd hintz sand Joste wie sev mugen. Datz ditze mein lestez geschaeft vnd als mein vorgeschribenz Selgeraet stet vnd vnzerbrochen hin furbaz beleib, Darvber gib ich disen prief mit meinen Insigel vnd mit Hern Walthers vnd Jansen meiner Svn Insigeln bestetiget. ze einem vesten vnd ze einem waren vrchund, vnd disen prief schullen inne haben zwen vnser peste frevnd, ob die vorgenanten mein Svn oder mein erben mein geschaeft nicht volfurten mit hern wernharts gewizzen mein Svn von sand Florian nach vrevntleicher monung, so sol er oder ander mein frevnd daz pringen an mein Herschaft mit minne oder mit recht also lang, vntz ez gar vnd gancz volfuret werd. Des sind gezeug: Her weichart von Pernawe. Jans von Chutzichofen, Chunrat, Dietreich vnd Heinrich die Gerwer, Hilprant von Stegen, Chunrat Chyenast, Vlreich Rosen Svn vnd darzv anderr piderber Levt genuech, den die red wol chund ist. Der prief ist darvber geschrieben vnd gegeben, do man zalt von Christes gepurd drevzehen hundert Jar, darnach in dem Sechs vnd dreizzigisten Jar an Sand Bartholomestag.

Source Fulltext: RAAB, Seitenstetten (=FRA II/33, Wien 1870) S. 202-204