Ich Ott der Cintzendorfer, vnd mein pruder Weichart, veriehen offenwar an disem prief, vnd tun chunt allen den, di nu sint, oder die her nach chumftich werdent, daz ein chrieg ist gewesen zwischen dem erbern herren, Apt Otachern, vnd seines Gotshaus ze Seidnsteten, vnd mein vnd meines prueder, vmb ein reut, daz do leit pei der Jacobin lehen, in dem Durrenpach, des selben chriegs sei wir verricht, nach weiser leut beweisung, daz wir dhain recht gehabt haben an dem selben reut, Von dem selben chrieg hab wir aller ding lazzen, daz wir furbaz dhain ansprach schulten haben, gegen dem Gotshaus vmb daz vor geschrieben reut. noch dhainer vnserer erben, Daz di red staet vnd vntzeprochen beleib, dar vber so geb wir disen prief, mit vnserm anhangundem insigel, ze einem ewigen vrchunt, Dez sint gezeug, Her Hainreich der Cintzendorfer, Her Ott der Stainer , Her Ott der Trauner, Ditreich von Gleuzz, Alram der wasner, Hainreich sein pruder, Chunrat von ybsitz, vnd ander erberer leut genuch. Ditz ist geschen, do von Christi gepurt warn ergangen Tausent Jar, Drev hundert Jar, dar nach in dem fumf vndzwaintzigistem Jar, an sand Cholmans Tag.

Source Fulltext: RAAB, Seitenstetten (=FRA II/33, Wien 1870) S. 180-181