Reuerendo in Christo patri et domino dom. Gundakchero, Venerabili Abbati, Totique Conuentui, Monasterij in Seytersteten. Mauricius dei gratia Abbas et Totus Conuentus Ecclesie sce. Marie Scotorum in Wienna, cum deuotis oracionibus in domino obsequiosam ad queuis beneplacita voluntatem. Defectum labentis temporis, et seculi transeuntis occasum. ex instabili statu, immo pocius ex stabili lapsu condicionis humane, licet omnibus intueri, Ecce enim miser homo non dimidiat dies suos, qui iuxta testimonium sacre scripture velocius transeunt, quam tela succiditur a texente, Quod beatus Job in subito filiorum occasu, diligenter intuitus, humanas plenius miserias deplorabat, Homo inquiens, natus de muliere, breui viuens tempore multis miseriis adimpletur. Incertitudinem eciam huius vite et finem subitum considerans Ecce inquit, in puluere dormio, et si mane me quesieris non subsistam, hoc et illo prophetico attestante, homo vanitati similis factus est, dies eius pretereunt velud vmbra, et quasi vas figuli confringetur, Consideremus ergo discrete, quod ille, qui calcato huius vite stadio et laudabiliter itinere sue peregrinacionis expleto, deuotum et humilem spiritum, in pace suo reddidit creatori, non obiit, sed abiit, ad vitam meliorem, et ad statum sicut speramus transiit pociorem, Beati igitur mortui, qui sic in domino moriuntur, vt post mortem tamquam iusti sint in bonorum memoria sempiterna Nec de illorum morte decernitur esse tristandum, qui cum pietate dormicionem accepisse videntur, ne videamur facere, sicut et ceteri, qui spem de resurrectione vltima nullam habent, nam illos non amisimus, sed premisimus, qui sic iubente domino ex hoc seculo transmigrarunt, immo pocius, elemosinis efficacibus, deuotis oracionibus, ac aliis ecclesiasticis suffragiis, eos quos viuentes dileximus et mortuos prosequamur. Hoc vestra circumspecta prouisio sollerter aduertens, et vt tantum bonum, quod sic in salutare solatium animabus prouenit defunctorum, vberius augeatur et fructuosius dilatetur, feliciter elegistis, et viue vocis oraculo petiuistis, inter nos vicissim, specialis confraternitatis affectionem mutuam et alternam vt qui hactenus eramus habitu sev professione confratres, denuo mutue karitatis et alternate confraternitatis, quo ad salutem viuorum et defunctorum requiem exorandam, quantum virtus nobis diuina contribuit, simus perpetim, hinc inde vnita deuocione conformes, Verum sicut gratum euenit, quod post vota suscipitur, sic incomparabiliter gracius, quod preter spem offertur, hinc est quod nos singuli et singulariter vniuersi, de tanta pietate, quam vestram beneuolenciam ad nos, ex hiis et multis aliis veresimilibus coniecturis, habere cercius experimur, ad graciarum vobis assurgimus actiones, Bonum nobis et valde iocundum in domino reputantes, vestre confraternitatis esse participes, qui estis vt fama testatur verior, in devocione grati, in conuersacione placidi, et in omni morum maturitate decori. Vnde nostre confraternitatis articulos, quos in decedentium fratrum nostrorum, ac confraternitatem nobiscum habencium obitu, in domo nostra laudabilis et antiqua conswetudinis obseruantia hactenus approbauit, et denuo volumus a nobis perpetim inuiolabiliter obseruari, vobis presentibus litteris in signum inite confraternitatis et inter nos indissolubiliter obseruande, transmissis, voluimus declararj, videlicet, quod statim, vt alicuius nostre confraternitatis obitus nobis cercius intimatur, priuato die proxime succedente, Vigilias longiores cum Nouem Lectionibus, et Missam defunctorum cum nota, ac compulsacione sollempni, in ara publica facimus decantarj Insuper quilibet de nostro Conuentu sacerdos Tres Missas defunctorum continuat. ni festum interueniat, quod si fuerit, statim festo decurrente complebit, Qui vero sacerdos non fuerit, litteras tamen sciens. tria leget Psalteria et Totidem Vigilias longiores. Reliqui vero nescientes litteras vt Barbati, CCC Pater noster, ipsius defuncti ac omnium in confraternitate decedencium animabus in remedium et salutare svffiragium dicere tenebuntur. Sperantes in summi gracia redemptoris, vs hiis sacramentorum suffragiis, aliisque nostris pietatis operibus, anime fratrum nostrorum, que ex hoc seculo feliciter transierunt ad eterne beatitudinis consorcium in celesti patria perducantur. Ceterum, vt et fructuum vestrorum bonorum operum possimus esse participes, qui et pij laboris haberi volumus non expertes, affectuose rogamus, vt et litteras vestras, super dicte confraternitatis mutuo federe confectas, nobis velitis transmittere, in signum perpetis vnionis. Datum wienne in nostro Monasterio. Anno dominj. Millesimo Trecentesimo, Vigesimo tercio, in Vigilia beati Jacobi apostoli.

Source Fulltext: RAAB, Seitenstetten (=FRA II/33, Wien 1870) S. 172-174