Ich Ott der Stainer van hausekk vergich offenwar vnd tuen chvnt allen den. die disen prief ansehent oder horent lesen. die nu lebent oder her nach chunftich werdent, daz ich mit wol verdachtem muet vnd nach meiner vreunt. vnd auch durich meinen vrum die acht lehen, die ich van dem gotshaus ze Sytansteten ze rechtem lehen gehabt han. die also wenant sint. ainez datz wernharten auf der zokelsowe. daz ander auf der Eben, daz dritte in der lengenowe. daz vierd datz dem Chnecht am Rechperge. daz funft datz dem schoephel am Rechperge. daz sechst im Tumphel. daz Sibent Emrigeslehen. daz achted am lungsperg. mit allem dem zehent. der da zue gehoret, wesuecht vnd vnwesucht, ze holtz vnd ze veld, mit allem dem. daz da zue gehoret dem erbern heren apt Gundachern ze Sytansteten im vnd seinem gotshaus, ledichleichen an alle ansprach vm Subentzich phunt phening wienner muniz, verchauft han, die er mier werait dar umb gegeben hat, also ob in oder sein Gotshaus chain Chrieg dar vmb an gienge, des schol ich für seu sten vnd schol in daz an allen ieren schaden auz pringen. Ich jach aines rechtes an der vishwayde jn der jbsitz. do pin ich auch mit guetleich willen van gestanden. also daz ich vnd alle mein erben nimmermer chains rechten dar auf geiehen schuln. vnd daz deu red vnd der chauf ewichleichen stet vn vnzeprochen weleib. dar vber gib Ich Ott der Stainer von hausekk dem vorgenanten apt Gundachern vnd seinem Gotshaus ze sytanst. disen prief ze vrchund. geuesten mit meinem insigel. vnd mit hern Otten van Traun Insigel. Des sint gezeug. Her Libhart der Preial. Her hainr. pharrer von holnstain. her albrecht der pharrer von Gresten. Alram vam wasen. alram der Stiller, Gotfried der richter ze Chunratshaimme. Chunrat fluschart. der statrichter. Herman der Chersperger, Chunrat von jbsitz. Ditrich der||
zechmaister. Mychel van mense. Ott der preuhauen vnd ander piderleut genueg. Daz ist geschehen datz waidhouen. do van christes geburde ist gewesen drezehenhunder jar. Dar nach in dem zwainzigisten jar. an sant Pauls Tag des wecherer.

Source Fulltext: RAAB, Seitenstetten (=FRA II/33, Wien 1870) S. 169-170