Ich Weigman Purger ze ybs, vnd ich Jevtte sein hausvrowe vergehen vnd tuen chunt allen den. di disen prief sehent oder horent lesen, di nv lebent, oder hernach chumftig sint, daz wier vnuersprochenleich mit guetem rat, vnd mit wol verdachtem muet, und auch mit guetleichem willen vnsrer Tochter vrowen Gedrauten, vnd aller vnser gerben. vnsern||
weingarten, der da leit ze Rechperch an dem lintperge, den wier nach vnser paider tot hintz dem Chloster ze Seitensteten gegeben haeten, daz wier den vnsere vrowen ze lob vnd ze eren, vnd den herren ze lieb, vnd vnsern selen ze einem ebigen hayl, vnd vnsern Oehaym hern Nyclan ze einer vurdrung, Ledichleich an alle ansprach, mit des Perchmaisters hant, vnuersprochenleich nv auf gegeben haben, allen ieres Gotshaus vrum vurbaz do mit zeschaffen so sev pest chvnnen vnd gemegen. vnd schulle wier des ier gewer sein ob in icht daran ab gieng, daz schulle wier in, mit anderm vnserm guet erstatten, vnd schullen auch in den selben weingarten vristen, Jar vnd tag als rechtz purchrechtz recht ist. Vnd daz dev sach stet vnd ewigleich vnzeprochen weleib. Dar vber geb wier den vorgenanten herren ze Seitensteten disen prief ze vrchund, versigilten vnd bestaetigten mit vnserm anhangundem Insigel. vnd mit vnsrer vorgenanten Tochtter insigel. vnd mit hern Symons des Richtter jnsigel. Des sint zeug, her Symon der Richtter ze ybs vnd sein brueder Dietreich. Jans, vnd vnser aydem Peter Reichher. Fridreich der sneider. Ruprecht der Smerpauch. vnd ander pider leut genueg. den diser sach wol chund vnd gewizzen ist. Diser prief ist gegeben in der Stat ze ybs. Do von Christes geburt ergangen waren, Dreuzehen hundert Jar. darnach in dem Achtzehentem Jar. an Sand Phylippes Tag.

Source Fulltext: RAAB, Seitenstetten (=FRA II/33, Wien 1870) S. 163-164