Ich Ditrich Schench von Tobra tun chunt allen den. di disen prief ansehent oder horent lesen. Daz ich den hof datz hertwigstain. der da haizzet der swaichof, mit den vier lehen.||
die da pei ligent. die auch hie gescriben sint. ain lehen vnderm Stain. zwei lehen hinterm hertwigstain. ainez auf dem hertweigsperge. vnd swaz zu dem hof gehoret vnd auch zu den lehen, besuchtz vn vnbesuchtz, benantz vnd vnbenantz. han gegeben vnser vrowen der rainen Chuneginne vn ir goteshaus datz Sytansteten pei des erbern herren apt chunrates zeiten, durich meiner sel willen vnd durch meiner hausfrowen. vern. Chunegunten sel willen vnd durch aller meiner vodern sel willen, die oft daz selbe goteshaus gelaidigt habent, Daz in Got vnd vnser vrowe. in der eren daz selbe Goteshaus gestift ist. gegenedichleich in ruech ze vergeben. Daz mit meiner hausfrowen vern Chunegunten vnd mit meines suns Ditriches vn mit meiner bruder hern Seifrides vn hern Hainrichs der schenchen gutlichem willen ist geschehen, dar vmb geit der vargenant her apt Chunrat meiner housfrowen. vern Chunegunten vnd meinem sun Ditrichen von seinen genaden einen lichchauf. daz si sich des var genanten guetes des der willichlicher verczeichen durch vnser aller willen, vn ist daz geschehen in solicher beschaidenheit ob jeme dem vor genanten Goteshause an dem guet deheinner chriege oder dehein vnrecht tun wolt, so schol ich Ditrich schench, vnd min hausfrowe. ver chunegunt, vnd mein sun dithrich vnd noch vns aller vnser erben dem goteshaus auz zepringen helfen, vn auch wesen sein geber. vnd daz daz gelub stet vnd vnzeprochen weleib. gib jch dem vorgenanten goteshaus datz Sytansteten disen prief ze einem ewigen gezeug bestetigt vnd geuestent mit meinem Insigel vnd mit meiner pruder Insigel. Her Seifrides vnd hern hainrichs der schenchen, vnd mit den erber zevgen, die dar an geschriben sint. der nam also haizzet. Her Hertwich vom wasen. her hainrich von harawe. Her Ott vom wasen. Her hainrich der streler. der voit von hag. Ruger von zauch. Herman der Neunwerger. Perchtolt der schech. vlrich vnd fridrich die pavzzen. Ditrich von harawe. Alram der Stiller, vnd anden piderwer leut genueg. den ez alle wol chunt vnd gewizzen ist. Daz ist geschehen do von Christes geburt sint gewesen Tausent Jar. vnd drev hunder Jar. Hernach jm sechsten Jar. an der heiligen frowen sant lucein tag.

Source Fulltext: RAAB, Seitenstetten (=FRA II/33, Wien 1870) S. 140-141