Alexander episcopus seruus seruorum dei. Dilectis filijs . . . Abbati et Conuentui Monasterij de Sytansteten. ordinis s. Benedicti. Patauiensis diocesis. Salutem et apostolicam benedictionem. Sacrosancta Romana ecclesia deuotos et humiles filios ex assuete pietatis officio propensius diligere consueuit. et ne prauorum hominum molestijs agitentur. eos tanquam pia mater sue protectionis munimine confouere. Eapropter. dilecti in domino filij. uestris iustis postulationibus grato concurrentes assensu. personas uestras et locum. in quo diuino estis obsequio mancipati. cum omnibus bonis. que impresentiarum rationabiliter possidet. aut in futurum iustis modis prestante domino poterit adipisci. sub beati Petri et nostra protectione suscipimus. Specialiter autem terras. domos. redditus. prata. nemora. possessiones et alia bona uestra. sicut ea omnia iuste ac pacifice possidetis. uobis et per uos Monasterio uestro auctoritate apostolica confirmamus. et presentis scripti patrocinio communimus. Nulli ergo omnino hominum liceat. hanc paginam nostre protectionis et confirmationis infringere. uel ei ausu temerario contraire. Si quis autem hoc attemptare presumpserit. indignationem omnipotentis dei beatorum Petri et Pauli apostolorum eius. se nouerit incursurum. Datum Viterbij III. Non. Januar. Pontificatus nostri Anno Quarto.

Source Fulltext: RAAB, Seitenstetten (=FRA II/33, Wien 1870) S. 58-59