Ich Rapot von Weyrberch vnd ich Anne sein Hausurowe wir vergehen vnd tu^en chunt allen den, die disen brief lesent oder ho^erent lesen, die nv lebent vnd hernach chu^enftich sinde, daz wir mit vnser Erben gutem willen vnd gunst, mit verdachtem mv^et und mit gesampter hande, zv^e der Zeit, do wir es wol getu^en mochten, verchavft haben vnsers rechten Aygens vnsern Hof, der da leit ze Hautzendorf ze naehst der Mu^el, vnd alles daz, daz zv^e demselben vnserm hof geho^eret, ze uelde vnd ze dorf, es sey gestift oder vngestift, versu^echt oder vnuersu^echt, swie so daz genannt ist. Denselben Hof vnd swaz darzv^e geho^eret haben wir Recht vnd redleichen verchauft vnd geben mit alle den nutzen vnd Rechten, als wir In in Aygens gewer herpracht haben, vmb syben vnd viertzich phunt Wienner phenning, der wir gar vnd gântzleich verricht vnd gewert sein, dem Erbern manne Dietreichen dem Schaffer vnd seiner hausvrown vron Margreten vnd irn Erben, fu^erbas ledichlichen vnd vreyleichen ze haben vnd allen irn frumen damit ze schaffen, verchauffen, versetzen vnd geben, swem si wellent, an allen irresal. Vnd darzv^e durch pezzer sicherhait so setzen wir vns, Ich vorgenanter Rapot von Weyrberch vnd ich Anne sein hausurowe, mitsampt allen vnsern Erben vnuerschaidenlich v^eber den vorgenanten Hof vnd v^eber alles daz, daz darzv^e geho^ert, dem egenanten Dyetreichen dem Schaffer vnd seiner hausurowen vron Margreten vnd irn Erben zv^e rechten Gewern vnd scherm fu^or alle ansprach, als aygens recht ist vnd des Lants recht ze Osterreich. War aber, daz si fu^erbas mit Recht an demselben Hof vnd an alle deu, vnd darzv^e geho^eret, icht Chriegs oder ansprach gewunnen, swas si des schaden nement, daz suln wir In alles avsrichten vnd widerchern an alle ir mv^e vnd an allen irn schaden, vnd suln auch si daz haben auf vns vnd auf allem vnserm Gu^et, daz wir haben in dem Lande ze O^esterreich, wir sein lebentich oder tode. Vnd daz diser Chauf fu^erbas also sta^et vnd vnzerbrochen beleibe, darumb so geben wir in disen brief zv^e einem warn sichtigem vrchu^end vnd zv^e einer ewigen vestnung diser sache versigilten mit vnserm Insigil vnd mit Nychlas Insigil des Fu^ellsakchs, mein Rapoten pru^eder, vnd mit Jo^erigen Insigil des Erbern Herren schreiber hern Albers von Pu^echhaime, die diser Sache Gezeug sinde mit irn Insigiln. Diser brief ist geben ze Wienn nach Christes Gebu^erde Dreuizehen Hundert Jar darnach in dem Neun vnd Vierczigisten Jar, des Eritags in der ersten gantzen vastwochen.

Source Fulltext: HAUSWIRTH, Schotten (=FRA II/18, 1859) S. 260-261