Ich Vllreich der Helphant von Nydernleizz vnd ich Chunigund sein Hausfraw veriechen alle den, diu disen Prieff lesent oder horent lesen, diu nu lebent vnd hernach chumftig sind, daz wir mit verdachtem muet, mit gesampter hant, mit czeitigem rat, mit guetem willen vnd gunst aller vnserr erben vnd auch cze der czeit, do wir izz wol getuen mochten, Recht vnd redleich verchaufet hawen vnsers rechten aygens ein Holcz, daz do leitt dacz Nydernleizz vnd haizzet der Junchfrawn Holcz, halbez vm Ochczehen phunt phening wienner Muncz, der wir gancz vnd gar verricht sein vnd gewert, dem erbern mann Jansen dem Helphant meinem Vetern vnd Vrown Elspeten seiner Hausfrawn vnd allen seinen erben, ledichleich vnd vreileich cze hawen vnd furbaz alln ieren frum damit cze schaffen, verchauffen, verseczen vnd gewen, swem siu wellen, alls in daz wol chom vnd fueg, an allen irsal. Vnd durch pesser sicherhait secze wir vns, Ich vorgenanter Vlreich vnd ich Chunigunt sein Hausfraw mit allen vnsern erben, dem egenanten Jansen dem Helphant vnd Vrawn Elspeten seiner Hausfrawn vnd allen seinen erben vber daz vorgenant Holcz cze rechtem gewern vnd scherm fur alle ansprach, alls aygens recht ist vnd des Landes recht in Ostereich. Vnd waz in furbaz mit recht daran abget, daz schulln seu hawen vnuerschaydenleich auf vns vnd auf all vnserm guet, daz wir hawen in dem Lande cze Ostereich oder swo wir izz hawen, wir sein lemtig oder tod. Vnd daz diser chauf vnd dise red furbaz also stet vnd vnczebrochen weleibe, darvber gew wir in disen Prieff cze einem offen vrchund vnd cze einem waren geczeug vnd cze einer ewigen vestigung diser sach versigelten mit vnserm Insigel vnd mit meinez Vetern Fridleinzz dez Helphantz Insigel, der diser sach geczeug ist vnd auch scherm mitsampt mir vnd meiner Hausfrawn fuer all ansprach. Vnd sint auch diser sach geczeug der erber Ritter her Dietmar von Nydernleizz, der erber mann Jans der Meer von Nydernleizz vnd auch ander erber Laut genuch, diu pei dem chauf vnd pei der wandlung sint gewezen. Der Prieff ist gegewen, do von Christes gepurd waren ergangen Drevczehen Hundert Iar darnach in dem Dreu vnd Vierczigistem Iar, an sand Giligen Tag.

Quelle Volltext: HAUSWIRTH, Schotten (=FRA II/18, 1859) S. 243