Uniuersis sancte matris ecclesie filiis, ad quos presentes littere peruenerint, nos miseracione diuina Guillielmus Antibarensis archiepiscopus, Petrus Calliensis, Johannes Bergerensis, Andreas Coronensis, Jacobus Valonensis, Franciscus Bisaciensis, Almannus Suanensis, Philippus Salonensis, Nicholaus Nazariensis, Benedictus Cardicensis, Paulus Fulginensis, Raymundus Catharensis et Rogerus Biuiensis episcopi salutem in domino sempiternam. Splendor paterne glorie, qui sua mundum ineffabili claritate illuminat, pia uota fidelium de clementissima eius maiestate sperancium tunc benigno precipue fauore prosequitur, cum deuota ipsorum humilitas sanctorum meritis et precibus adiuuatur. Cupientes igitur, ut capella sancti Andree in monasterio Scottorum in Vienna Patauiensis diocesis congruis honoribus frequentetur et a Christi fidelibus iugiter ueneretur, omnibus uere penitentibus et confessis, qui ad dictam capellam in omnibus sancti Andree festiuitatibus et in dedicacione eiusdem ac in aliis festis infrascriptis, uidelicet natalis, domini circumcisionis, epiphanie, parasceues, pasche, ascensionis, pentecostes, trinitatis, corporis Christi, inuencionis et exaltacionis sancte crucis, in omnibus et singulis festis beate Marie uirginis, sancti Michaelis archangeli, in festis sancti Iohannis baptiste ac Petri et Pauli et omniurn apostolorum et euangelistarum, sanctorum quoque Stephani, Laurencii, Martini, Nicholai, Gregorii, Augustini, sanctarumque Marie Magdalene, Katerine, Margarete, Cecilie, Lucie, Agathe uirginum, in commemoracione omnium sanctorum et animarum et per octauas dictarum festiuitatum octauas habencium, singulis quoque diebus dominicis et sabbatis causa deuocionis, oracionis aut peregrinacionis accesserint, seu qui missis, predicacionibus, matutinis, uesperis aut aliis quibuscumque diuinis officiis ibidem interfuerint, aut corpus Christi uel oleum sacrum, cum infirmis portentur, secuti fuerint, seu in serotina pulsacione campane secundum modum curie Romane genibus flexis ter aue Maria dixerint, nec non qui ad fabricam, luminaria, ornamenta aut queuis alia dicte ecclesie necessaria manus porrexerint adiutrices, vel qui in eorum testamentis aut extra aurum, argentum, uestimentum aut aliquod aliud caritatiuum subsidium dicte capelle donauerint, legauerint aut procurauerint, et qui pro presentis indulgencie impetratore et pro suis parentibus et amicis ac dicte capelle benefactoribus orauerint, quotienscumque, quandocumque et ubicumque premissa uel aliquid premissorum deuote fecerint, de omnipotentis dei misericordia et beatorum Petri et Pauli apostolorum eius auctoritate confisi singuli nostrum quadraginta dies indulgenciarum de iniunctis eis penitenciis misericorditer in domino relaxamus, dummodo dyocesani uoluntas ad id accesserit et consensus. In cuius rei testimonium presentes litteras sigillorum nostrorum iussimus appensione muniri. Datum Auinioni XX. die Mai, anno domini M^o. CCC^o. XXXVII^o. et pontificatus domini Benedicti pape XII. anno tercio. (Mit anderer Schrift folgt): Et nos Albertus, dei gratia Patauiensis episcopus, suprascriptas indulgencias, prout prouide concesse sunt, ratas et gratas habentes et quadraginta dies indulgenciarum auctoritate nostra ordinaria addicientes eas, quantum de iure efficacius possumus, cum appensione sigilli nostri confirmamus sub anno domini millesimo tricentesimo tricesimo septimo, octauo Ydus Septembris.

Source Fulltext: HAUSWIRTH, Schotten (=FRA II/18, 1859) S. 212-213