Innocentius episcopus seruus seruorum dei dilectis filiis abbati et conuentui monasterii beate Marie Scotorum in Wienna ordinis sancti Benedicti Patauiensis diocesis salutem et apostolicam benedictionem. Cum a nobis petitur, quod iustum est et honestum, tam uigor equitatis quam ordo exigit rationis, ut id per sollicitudinem officii nostri ad debitum perducatur effectum. Sane uestra petitio nobis exhibita continebat, quod clare memorie Henricus dux Austrie ius patronatus, quod in Pulka et in Ekkendorf ecclesiis Patauiensis diocesis obtinebat, Rogerii quondam Patauiensis episcopi postmodum accedente consensu, nec non de Virochperge et Hipelinsdorf villas et quasdarn possessiones in Ruspach et in Feldrendorf pertinentes ad eum uobis et monasterio uestro contulit intuitu pietatis, prout in litteris inde confectis plenius dicitur contineri. Nos itaque uestris supplicationibus inclinati, quod super hiis pie ac prouide factum est et in alterius preiudicium non redundat, ratum et gratum habentes id auctoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre confirmationis infringere uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum Asisii V. idus Maii, pontificatus nostri anno vndecimo.

Source Fulltext: HAUSWIRTH, Schotten (=FRA II/18, 1859) S. 43