Gregorius episcopus seruus seruorum dei venerabili fratri episcopo Patauiensi salutem et apostolicam benedictionem. Ecclesie sancte catholice pia per orbem terre confessione tenetur, quod beatus Gregorius, Christi confessor et pontifex gloriosus, quem sedi apostolice regis eterni clementia uoluit presidere, cum adhuc esset in nostre mortalitatis habitu constitutus, deo et hominibus studio sancte conuersationis placere meruit et tandem ad perceptionem perempnis glorie conuolauit. Cum igitur ex suorum processerit preminentia meritorum, quod et magnus in sanctorum numero haberi dinoscitur et natalitii sui dies in Rornana ecclesia nec non in pluribus mundi partibus cum grandi reuerentia celebratur, nos dilectorum filiorum abbatis et conuentus Scotorum de Wienna tue diocesis deuotis supplicationibus inclinati fraternitati tue presentium auctoritate mandamus, quatinus prudenter aduertens, quod dignum sit, ut dictus confessor, per cuius doctrinam adinstar solis ecclesia fulgere conspicitur, apud uniuersitatem fidelium celeberrimus habeatur, ipsius festum per omnes ecclesias predicte diocesis sollempniter celebrari facias ad honorem et gloriam redemptoris, presertim cum prouenturum de huiusmodi sollempnitate speretur, quod et terre populus conditori omnium pleniori placere deuotione studeat et facilius ab hijs, que diuine maiestatis offendunt oculos, resipiscat. Datum Laterani XII. kalendas Januarii, pontificatus nostri anno duodecimo.

Source Fulltext: HAUSWIRTH, Schotten (=FRA II/18, 1859) S. 38