"Von Gottes genaden, wir Vrban(1), bischoue zu Passau etc: Bekhennen, das wir vnnserm getreuen Christophen Khelhamer(2), burgern vnnd des raths zu Haslach, anstat vnnd zu hannden sancts Niclaß gotshaus daselbst zu Haslach, alls desselben lehentragern, das guet in der Voraw(3) in Peuerbeckher pfarr vnd landtgericht, jtem vnd das guet zue Hartmansdorff(4) in sant Peters pfarr vnnd Haslinger lanndtgericht gelegen, so von vnns vnd vnnserm stifft Passaw zu lehen ruren vnnd geen, zu rechtem lehen verlihen haben. Verleihen jme die auch mit allen jren zuegehörungen hiemit wissentlich vnnd in crafft dicz briefs, was vnnd souil wir jme dann billich von lehen vnd rechtens wegen daran verleihen sollen vnnd mugen. Darauf [......](5). Zu vrkhundt dicz briefs vnnder vnnserm anhangendem secret verferttigt. Geben in vnnser statt Passaw, den ainundtzwainzigisten monatstage januarj(6), nach Christj vnnsers lieben herrn vnnd seeligmachers genadenreicher geburde im funffczehen hundert vnnd sibenundtachzigisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 666 (S 477), S. 730-731