"Ich Matthias(1), aus Gottes fursehung brobste zum Schlögl: Bekhenn für mich vnnd all meines vertrautten gotshaus ewige nachkhumen, das jch ainer ganntzen nachparschafft jm dorf Kersch Paumb(2) auf derselben gehorsamb diemuetiges flehen, anruefen vnnd pitten, in erwögung, das sy hieuor mit ainichen gehültz vnnd waidt zue jrer hauss vnnd viechs notturfften nit versehen, das gehültz vnndterhalb des weggs von Zagglaw(3) gein Mitterreit(4), sambt dem pluembsuech, dessen jres gefallens one allen forsst, zue dero notturfften zue geprauchen vnnd zue waiden. Beynebens auch den pluembsuech vnnd waids am ganntzen Fuxbergg(5), das holltz aber vmb den gewonnlichen forst, vmb ein summa gellts, deren jch vnnd das gotshaus von jnnen erbarlichen enntricht vnnd par pezallt worden sein, aigenthumblichen verkhaufft vnnd kheuflichen eines ewigen stätten khaufs zue khaufen geben habe. Also vnnd der gestallt, das sy, die gemainne Kerschpaumber, vnnd alle jre nachkhummen, das obuermellt gehültz vnndterhalb des weggs von Zagglaw gein Mittereicht sampt dem pluembsuech one aller menigklichs jrr vnnd hindernuß, wie vnnd zue wo sy verlusst, zue jrer notturfften, nun vnnd hinfüro aigenthumblichen, am Fuchsperg aber allain den pluembsuech, vnnd das holtz vmb den forst sollen vnnd mugen jnnhaben, nützen, nüessen vnnd geprauchen, als annder jre aigenthumbliche guetter, daruon sy doch jarlichen alle jar zue dem gewonnlichen diennstzeit den darauf geschlagenen diennst, wie derselbig in des gotshaus vrbar verzaichnet, bei verlusst des erkhaufften holtz, richtig machen, endigen vnnd bezallen sollen. Deß zue vhrkhundt hab jch ermellter nachparschafft zue Kerschbaum disen khauf vnnd reuers brief mit meines vertrautten gotshaus mitterm secrets jnnsigil, doch dem jnnsigil vnnd gotshaus an dero just, gerechtigkhait vnnd einkhumen one schaden geuerdiggte zuegestellt vnnd beihenndigen wollen. Geben den achten augusti, der wehniger zall Christi jn dem zweiundtachtzigisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 654, S. 718-719