"Von Gottes genaden. Wir Wolfganng(1), bischoue zu Passau: Bekhennen, das wir vnnserm getreuen Georgen Khelhaimern(2), burgern zu Haslach, anstat vnnd zuhannden sanndt Niclaß gotshaus daselbs zu Haslach als desselben zechmaister vnnd lehentragern das guet in der Voraw(3) in Peurbeckher pfarr vnnd lanndtgericht, jtem vnnd das guet zu Hartmansdorff(4) in sand Peters pfarr vnnd Haslinger lanndtgericht gelegen, so von vnns vnnd vnnserm stifft Passau zu lehen rurn vnnd geen, zu rechtem lehen verlihen haben. Verleihen jme die auch mit allen jren zuegehörungen hiemit wissentlich vnnd in chrafft ditz briefs, was vnnd souill wir jme dann billich von lehen vnnd rechtens wegen daran verleihen sollen vnnd mugen. Darauf hat vnns er gewonndliche lehenspflicht gethan, vnnd an aidesstat gelobt, vnns vnnd vnnserm stifft Passau getreu vnnd gewertig ze sein, vnnsern vnnd vnnsers stiffts frumen ze furdern, schaden ze warnnen vnnd ze wennden, vnnd die versch[w]igen lehen, wo er deren wissen hete oder erfure anzuzaigen, auch von den lehen, so jme verlihen sindt, geuerlich nichts veränndern oder entziehen ze lassen, noch jchts on vnnser als lehenherrns wissen vnnd willen daraus zu uerkhomern, vnnd sich sonnsten in allen anndern sachen ze halten als ain getreuer lehensman vnnd trager von solcher lehen wegen ze thuen schuldig ist ongeuerde. Zu vrkhundt deß briefs, vnnder vnnserm anhanngunden jnsigl. Geben in vnnser stat Passau, sambstags den sibenvnndtzwaintzigisten monats tag martij, nach Cristi vnnsers lieben herrn vnnd seligmachers geburde funftzehen hundert vnnd jm sibenvnndfunftzigissten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 619 (S 445), S. 687-688