"Ich Jorg Diendorffer(1) zue Gneissenaw(2), die zeit mautner zue Eferding: Bekenn das für mich kam Jorg Weber(3) zu Golneren, an der zeit zechmaister des wirdigen gotshaus sand Jacob zu Rorbach, path mich mit vleiss, jm alls lehentrager des gedachten gotshauss zway tail zehent auf der Jnneren Öd(4), jn Sarleinspecker pfarr vnd Veldner landtgericht gelegen, meiner lehenschaft geruechte zuuerleyhen. Hab jch angesehen sein zimlich gepeth vnnd jm anstat obbenanten gotshaus alls einem lehentrager dy verlihen hab, leich jm die auch wissentlich mit vnd jn craft des briefs, was jch jm anstat des wirdigen gotshaus sand Jacob daran verleihen sol vnd mag, also das er vnd sein nachkomen alls lehentrager die gemelten zway tail zehent mit jrem zuegehorn jn lehenweis jnnhaben, nutzen, niessen vnd alsofft es sich vermant, lehen nemen, auch mir vnd meinen erben allweg des nechsten suntags nach sand Mertentag am dritten jar dauon gen Gneissenaw raichen vnd geben funfundviertzig pfening, auch jn aller vordrung dauon gehorsam vnd gewerttig sein, alls rechtlehens, landes Osterreich ob der Enns recht ist angefer. Zu vrkund mit meinem anhangenden jnnsigl, doch mir vnd meinen erben an der lehenschaft, rechten vnd vordrung vnuergriffen vnd an schaden. Der geben ist des montags sand Michelstag, nach Cristj gepurd funftzehen hundert vnd sechtzehen jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 571 (S 407), S. 644-645