"Ich Lienhart Scherdinger(1), altt richter zu Rorbach, Dorothe mein hausfraw, wir pekennen fuer vnns vnd all vnnsser eriben vnd duen kund offenlichen mit dem prieff allen den er furchumbt zu sechen, horen oder lessen, das wir recht vnd redlichen verkaufft vnd keyfflichen zu kauffen geben haben, vnd geben auch wissentlichen in krafft des prieffs Andre dem Dannczepfer(2), Elspeten seiner hausfrawen vnd all iren paiden eriben vnnseren zechentt, die zway tayll, der da ligtt auf dem Grepelhoff(3) in sand Petters pfarr vnd in Haslinger landgerichtt gelegen, da von man dintt dem edlen vnd vesten Sigharten am Perig(4) zu Vichhoffen(5) albeg in dem dritten jar drey schylling pfenning zu lechenstewr, vmb ain summe gelts, des wir von in schon ausgericht vnd peczalt sein worten zu rechten tagen an allen schaden in sollicher peschaiden, das ich obgenanter Lienhart Scherdinger, Dorothe mein hausfrawen vnd all vnnsser paider eriben zu dem obgenanten zechatt nun furan kaynerlay zuespruch noch anuadrung nicht mer haben sullen noch wellen, weder mit recht noch an rechtt, in kaynerlay weis trewlich vnd vngeuerlich. Es mag auch nun fueran der obgenant Andre Dannczepfer, Elspett sein hausfrawen vnd all ier paider eriben mit dem obgenanten zway taill zechatt woll allen iren frumen damit zu pedrachten mit versetzen, verkauffen, schaffen, machen vnd geben, wemb sew verlust vnd guet zymbt, an alle irung vnnsser vnd aller vnnsser eriben vnd menyklichs von vnnsseren wegen widersprechen angeuer. Vnd ob in ichtt krieg oder ansprach von vnns oder vnnseren eriben aufferstuend, des sew mit dem rechten in schaden kaemen, wie der genant mag werden, kaynen ausgenomen, den selbing schaden allen zu sambt dem haubtguet, geloben wir in abzudragen vnd wider zu keren, vnd sew sullen das alles haben vnd pekomen, dacz vnns vnd allen vnnseren eriben vnd guet, wo wier das vber all yndertt haben, gewingen oder hinder vnnsser lassen, nichts ausgenomen, alles trewlich vnd vngeuerlichen. Des zu vrkund gyb ich obgenanter Lienhart Scherdinger, Dorothe mein hausfraw, dem egenanten Andre Dannczepfer, Elspetten seiner hausfrawen den kauff prieff, pesigelt durich vnnsser vleissigen pett willen mit des edlen vnd vesten Sigharten am Perig zu Vichhoffen anhangunden insigell, doch ym vnd sein eriben vnd insigell an schaden, an seinen dinsten, vadrung vnd lechenschafft vnnuergriffenlich vnd an schaden. Vnder das insigell wier vnns verpinten mit vnnseren dreun in aides stat, alles war vnd stet zu halten, das an dem prieff geschriben stet, der geben ist am pfincztag nach sand Vyllypp vnd Jacobs tag, do man zalt von Kristy gepurd taussent vierhundert vnd ym czway vnd newnczigkisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 510 (S 359), S. 570-571