"Nos Jacobus(1), Dei gracia prepositus ac conuentus monasterij sancte Marie virginis in Newnburga claustrali(2), ordinis sancti Augustini, canonicorum regularium Patauiensis dyocesis, reuerendo in Christo patri ac venerabilibus viris dominis, domino Johanni(3) preposito ac conuentui monasterij Plage Marie virginis, ordinis Premonstratensis, eiusdem Patauiensis dyocesis, orationes nostras ad Deum ac sinceram recommendacionem. Cum inperscrutabilis bonitas summi Dei filius post lauacrum baptismatis multa nobis contulit remedia saluti animarum accomoda, inter alia tamen potissimum caritatem, que vinculum perfeccionis est in jnuicem obseruandam demonstrauit. Nos propterea animarum nostrarum ex utraque parte salutem procurare cupientes, vestras paternitates ac earundem successores generaliter et in solidum cum plena caritate in nostram fraternitatem(4) recipimus, volentes vos fieri participes in vita ac in morte omnium oracionum, missarum necnon ceterorum bonorum operum ac piarum accionum, que Deo auctore per nos et successores nostros in prefato nostro monasterio perficientur. Addicientes, ut quocienscumque aliquis fratrum prefati monasterij vestri volente Domino decesserit et eius nobis fuerit nunciatus obitus, ex tunc in eius anime remedium vigilias ac missam defunctorum quam cito decantabimus, cerimonias, aliaque caritatis opera, quemadmodum apud nos solitum est, pariter adiungendo et nichilominus apud conuersos nostri monasterij, vt eorum quilibet centum pater noster ac totidem aue maria dicere debeat, constituendo: Necnon nomen illius ob perpetuam memoriam annalibus nostris annotari faciemus realiter et cum effectu. Jn cuius rei testimonium perpetuum presentes tradimus litteras nostrorum prelature ac conuentus sigillis appendentibus roboratas. Datum decima octaua die mensis nouembris, anno Domini millesimo quadringentesimo octuagesimo quinto."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 498 (S 351), S. 556-557