"In nomine Domini. Amen. Anno natiuitatis eiusdem millesimo quadringentesimo septuagesimo tercio, indiccione sexta, die vero solis decimanona mensis septembris, hora primarum aut quasi, pontificatus sanctissimi in Christo patris ac domini nostri, domini Sixti(1), diuina prouidencia pape quarti, anno eius tercio, jn mei notarij publicj testiumque subscriptorum ad infra scripta specialiter vocatorum et rogatorum presencia reuerendus pater et dominus, dominus Andreas(2), monasterij beate Marie virginis jn Plaga, Patauiensis diocesis, prepositus, in stuba communi solite habitacionis(3) dote ecclesie parrochialis sancti Jacobi apostoli, eiusdem diocesis, personaliter constitutus, nonnullas litteras apostolicas et processus desuper confectos secum tenens et deferens, de quibusquidem litteris prefatis tenore et effectu prefatus idem dominus prepositus, me notarium infrascriptum loculenter jnformauit, edocuit ac in infrascriptis actibus vnacum subscriptis testibus testimonium prebere et eisdem interesse solempniter requisiuit. Sicque vigore dictarum litterarum signanter clausule in eisdem litteris apostolicis et processibus contente, que cauit, quod cedente uel decedente moderno ipsius dicte parochialis vnite ecclesie vicario, siue illam quomodolibet dimittente eiusdem vnite ecclesie corporalem possessionem per se uel alium seu alios auctoritate propria de predicta apostolica sibi concessa auctoritate libere et perpetuo retinere et apprehendere valeat ad obitum bone memorie domini Wolfgangi Perger(4), eiusdem parrochialis ecclesie vltimi et inmediati perpetui vicarij, idem dominus prepositus huiusmodi corporalem possessionem propria auctoritate apprehendit, et in signum vere apprehensionis Pernhardum(5), sui conuentus professum, in ipsam dotem et in ea degendum constituit, pariter et decreuit, cuique fratri Pernhardo per reuerendissimum dominum nostrum episcopum Patauiensem exercicium animarum cure ad plebem prefate parrochialis ecclesie per patentes litteras commissum et concessum fuit, tam diu et longe, quousque a suo preposito ibidem tollerabitur, de quibus iam dictus pater solempniter et publice protestatus fuit. Jnsuper idem dominus prepositus hora prescripta ecclesiam parrochialem jn Rorbach ingressus fuit jn signum, quod iterum vere possessionis et apprehensionis ecclesie stallum chori apprehendit, et demum jndutus jn sacrastia ornatibus in ipso summo altari sancti Jacobi patroni coram tocius plebis multitudine diuina officia peregit, peractis illis ad prefatum stallum et dotem rediens omnia et singula super posita, itaque publice expresse et solempniter protestabatur, ac me infra scriptum notarium, vt sibi desuper vnum aut plura, tot quot fuerunt necessaria jnstrumentum seu jnstrumenta conficerem, solempniter requisiuit. Acta sunt hec anno, die, indiccione, pontificatu, hora et loco quibus supra, presentibus ibidem honorabilibus et discretis viris, dominis Casparo Stettner(6) olim ibidem vicario, Petro(7) primissario, Andrea(8) diuinorum cooperatore, ac Johanne(9) ibidem scolastico, testibus ad premissa vocatis pariter et requisitis."||
||
[NOTARIATSSIGNET] "Ego Johannes Zobel(10) de Jllmuenster, clericus Frisingensis diocesis, jmperiali auctoritate notarius: Quia omnibus et singulis, dum sic vt premittitur, fierent et agerentur, presens personaliter interfui, eaque cum prenominatis ||
testibus fieri vidi sic et audiui, jdeoque presens hoc publicum jnstrumentum de propria manu conscriptum, exinde confeci et in hanc publicam formam redegi, signoque et nomine meis solitis et assuetis consignaui jn fidem robur et euidens testimonium omnium premissorum."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 450 (S 322), S. 496-497