"Branda(1), miseratione diuina tituli sancti Clementis sacrosancte Romane ecclesie presbyter cardinalis, Placentinus vulgariter nuncupatus, jn regno Boemie ac Misnensi et Morauie marchionatibus apostolice sedis legatus, dilecto nobis in Christo . . preposito in Plaga(2), ordinis Premonstratensis, Patauiensis diocesis, salutem in Domino sempiternam. Conquestus est nobis venerabilis pater Rutgerus(3) abbas monasterij Sancte Corone(4) Pragensis diocesis, quod nonnulle persone vtriusque sexus et homines super certis bonis, censibus, redditibus et decimis ad suum monasterium spectantibus et pertinentibus iniuriantur eidem(5). Jdeoque discrecioni tue per hec nostra scripta auctoritate nostre legacionis mandamus, quatenus vocatis qui fuerint euocandi et auditis hincinde propositis quod iustum fuerit, appellacione remota, vsuris cessantibus, debito fine decidas, faciens quod decreueris, per censuram ecclesiasticam firmiter obseruari, prouisone dicti census contra Lateranensis(6) statuta concilij sint impositi uel adaucti. Testes autem qui fuerint nominati, si se gracia, odio uel timore subtraxerint, censura simili appellacione cessante compellas, veritati testimonium perhibere. Jn quorum testimonium presentes litteras fieri, nostrique sigilli iussimus appensione muniri. Datum Nurenberge(7), Bambergensis diocesis, in domibus nostre residencie, sub anno a natiuitate Domini millesimo quadringentesimo uicesimo secundo, jndiccione quinta decima, die vero Jouis tercia mensis septembris, pontificatus sanctissimj in Christo patris et domini nostri, domini Martinj, diuina prouidencia pape quinti, anno quinto."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 282, S. 302