"In nomine Dominj. Amen. Anno a natiuitate eiusdem millesimo quadringentesimo vicesimo, jndiccione tredecima, die vero vicesima secunda mensis aprilis, hora nonarum vel [quasi], pontificatus sanctissimj in Christo patris ac domini nostri, domini Martinj(1), diuina prouidencia pape quinti, anno eius tercio, jn mei notarij publicj testiumque subscriptorum ad hec specialiter vocatorum et rogatorum presencia personaliter constituti, primo venerabilis ac religiosus in Christo pater et dominus, dominus Wernhardus(2), prepositus monasterij beate Marie virginis jn Plaga, ordinis Premonstratensis, Patauiensis diocesis, deinde discreti et honorabiles virj domini Vdalricus Grwebêr(3) de Monaco, rector parochialis ecclesie jn Rorbach presbiter, necnon Wolfgangus Perger(4), clericus dicte Patauiensis diocesis. Jdem dominus Vdalricus non vi, dolo, muneribus, metu seu aliqua machinacione sinistra circumuentus, sed vt asseruit, propter alterius beneficij assecucionem, eandem ecclesiam suam ad manus ipsius domini prepositi Plagensis, collatoris eiusdem ecclesie in Rorbach, libere ac voluntarie resignauit, qua resignacione ||
facta mox et incontinentj, idem dominus Wernhardus, prepositus et collator, prefato Wolfgango Perger coram ipso genuflectenti et id humiliter petenti, eandem ecclesiam in Rorbach, sic vt premittitur, ad manus suas resignatam, cum omnibus juribus et pertinenciis suis contulit, sibique de eadem melioribus modis et vijs, quibus potuit effectualiter prouidit. Jdem vero Wolfgangus ad statim reuerenciam atque obedienciam condignas exhibuit, jpsum amplius tenendo et amplectando, et eciam eius successores, prepositos Plagenses, tamquam suos collatores ac prelatos, quibus sic peractis, idem dominus Wernhardus prepositus et collator alta et intelligibilj voce expressit atque subiunxit dicendo hec verba vel hijs similia, domine Wolfgange, vobis constat ac manifeste apparet, quod quilibet rector in Rorbach, pro tempore existens, nobis et nostro conuentuj, et nostris successoribus, annuatim soluere tenetur sedecim libras denariorum vsualis monete, vnacum quatuor libris denariorum ad sacristiam ecclesie Patauiensis pertinencium. Qui dominus Wolfgangus se protunc beniuole et humiliter ad presentandum dicto domino preposito et conuentuj, ipsiusque et eorum successoribus, interim quod esset in humanis, per se, suum procuratorem aut vicarium sue ecclesie in Rorbach annuatim dictam summam peccuniarum singulis quatuor temporibus quatuor libras denariorum vnacum quatuor libris venerabili domino . . custodi Patauiensis ecclesie kathedralis debitis, absque contradiccione, ad dandum, tradendum, soluendum et porrigendum suo tempore, quemadmodum sui antecessores assignassent, obligauit et asstrinxit se eciam ad priuilegia eiusdem monasterij desuper confecta referendo. Demum honorabiles ac discreti viri, dominus Stephanus Ploch(5) rector parochialis ecclesie in Velden, Nicolaus Perger(6) pater carnalis ipsius domini Wolfgangi instituti, ac ipse Wolfgangus ad manus eiusdem domini Wernhardi prepositi fide data promiserunt et quilibet eorum promisit quod amplius erga strenuum militem dominum Andream Herleinsperger(7) eiusque successores, ac alios castellanos et nobilistas, efficaciter instare vellent, ne in futurum per ipsarum preces inquietarentur, quandocumque se casus offerret quod dicta ecclesia in Rorbach vacaret per mortem, assecucionem seu permutacionem. Super quibus omnibus et singulis tam ipse dominus Wernhardus prepositus sepedictus pro se et nomine sui monasterij, quam dominus Wolfgangus, pecierunt sibi per me, notarium publicum infrascriptum, vnum vel plura, tot quot forent necessaria, conficj publica jnstrumenta. Acta sunt hec Patauie jn curia habitacionis, jn stuba maiorj reuerendi jn Christo patris ac domini, domini Wenceslaj Thyem(8) sancte sedis apostolice prothonotarij ecclesie Patauiensis prepositi et archidiaconi, anno, indiccione, die, mensis, hora et pontificatus, quibus supra, presentibus ibidem, eodem domino Wenceslao preposito, necnon honorabilibus ac discretis viris dominis Thoma Groessel(9) vicario chori eiusdem ecclesie Patauiensis jn Haymdorf, et Georio Czeidlarer(10) jn Staynakirchen, ecclesiarum parochialium rectoribus, presbyteris prefate Patauiensis diocesis, testibus ad premissa vocatis pariter et rogatis."||
||
[NOTARIATSSIGNET] "Et ego, Leonardus Foerstêr(11), clericus Patauiensis, publicus auctoritate jmperiali atque consistorij Patauiensis notarius iuratus atque scriba. Quia premissis resignacioni, collacionj, prouisioni, expressioni, obligacioni, promissioni et protestacioni, omnibusque alijs et singulis premissis, dum sic fierent et agerentur, vnacum prenotatis testibus presens interfuj eaque sic fieri vidi et audiuj, jdeoque hoc publicum jnstrumentum manu propria scriptum, exinde confecj, publicauj, et in hanc formam publicam redegi, signoque et nomine meis solitis et consuetis consignaui, jn fidem et testimonium omnium et singulorum, per venerabilem in Christo patrem ac dominum, dominum Johannem(12), modernum prepositum ecclesie Plagensis, sui ac eius conuentus nomine, occasione premissorum rogatis et requisitis."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 276 (S 184), S. 295-296