"Ich, Gunddakker von Tannberkch(1), vergich fur mich vnd all mein erben vnd nachkomen offenbar an dem brieff allen lewten, den der brieff furchumbt odder geczaigt wirt, daz ich recht vnd redleich chawffleich gechawfft han von den erwirdigen geystleichenn herrenn, herrn Merttein(2) brobst zw vnser frawnn Slag vnd seinen pruedern vnd dem covent doselbs dew drey hoff dacz Harraw(3), gelegen jn Rorbecher pharr, allz der chawffbrieff lawt, so ich von dem obgenanten brobst vnd seinem couent hab. Darumb hab ich mich, obgenanter Gunddakker von Tanberkch, wolbedechleich bedacht vnd durich merung willen dez gotzdiennst vnd durich haill vnd selldden willen aller meiner vorvadern meins enn herrn Ordneyden von Tannberkch(4) vnd meins vater herrn Vllreichs von Tannberkch(5) vnd herrn Pilgreims von Tannberg(6) salligen dem Got genaddt vnd darnach mir vnd all mein erben vnd durich aller vnser sell willen, vnd han dew obgenanten drey hoff hin wider geben dem vorgenanten brobst zw vnser frawn Slag vnd seinen pruedern vnd dem couent doselbs jn irr pitancz vnd phfruend(7), doch alsso mit awsgenomen warten, daz der obgenant brobst, der zu der selben czeit awff der stat brobst ist vnd darnach wiert, vnd awch dew prueder doselbs allen meinen vorvodern, dew oben genant sind vnd darnach mir vnd mein erben ymmer vnd ewichleich ayn ewigew mezz(8) allew tag tagleich haben sullen awff dem altar(9), den mein obgenant vorvadern jn den erenn der lieben vnsern frawn gestifft vnd gwidemt habent, vnd darczue ayn ewigs liecht(10), daz pey der mezz prinnen scholl mit zwain auffstechunden wachs cherczen vnd mit aynner wandlung cherczen pey der wandlung, vnd scholl awch der obgenant brobst vnd wer nach jm brobst ist vnd wirt, dem briester, der dew mezz spricht, allew tag tagleich geben drey Wienner phening cze hannt nach der mezz vnd all dew weill vnd daz gotzhaws drey priester(11) mag gehaben, so scholl dew mezz vnd daz liecht, daz auff dem altar pey der mezz prinnen scholl, noch dew drey phenning gelltz nymermer mer abgen, awch scholl dew mezz tagleich vnder den herren vnd priestern vmb genn. Wer aber, daz dew mezz vnd daz liecht alsso tagleich nicht volbracht wurdt, ezz sey von sawmnichait wegen der brobst vnd seiner prueder wegen dez couentz, so hab ich, obgenanter Gunddakker von Tannberkch, mein erben vnd nach chomen, vnd wer mein guet vnd dew vest zw Pirchenstain(12) nach mir besiczt, vollen gewallt der obgenanten dreier hoff dacz Harraw zw vnderwinden vnd dew nucz darrawff nyder zw legen, damit sy dem brobst vnd dem couent nicht ingeantwurt werden alz lanng vnczt daz sew allz erstaten, daz sew versawmbt habent, vnd wan sew daz dan erstaten, so scholl man jn dew hoff wider in antwurten vnd chayn jrrung jn den nuczen nicht tuenn. Wer aber, daz dew mezz zwen tag oder drey oder mer verczogen wurdt von erhaffter not wegen dez brobst vnd dez couentz, daz schullen sew am nagsten tag darnach allz erstattenn. Vnd dez zw vrchund gib ich, obgenanter Gunddakker von Tannberkch dem obgenanten brobst zw vnser frawn Slag vnd seinem conuent doselbz den brieff, besigellt fuer mich vnd all mein erben vnd nachkomen mit meinem aygen anhangunden jnsygill. Vnd der sach ist czewg durich vnser fleizziger pet willen der eddll mein lieber ohaym her Hainreich der Valchenstaynner(13), vnd der erber weizz Ekchart der Herlleinsperger(14) mit jrr payder anhangunden jnsigilln, doch in paiden vnd allen jren erben an schaden. Der briff ist geben, do mon czallt von Christy gepurdt vierczehen hundert jarr, vnd in dem newnten jar, am montag nach vnser frawntag cze der liechtmezz."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 249 (S 161), S. 259-260