"Ich, Vlreich von Chrotendorf(1), vergich vnd tvn chunt allen den, di nu lebent oder her nach chuemftig sint, di disen prief sehent oder hoerent lesen, daz ich willichleichen vnd mit verdachtem mvet vnser vrawen ze lob vnd ze eren vnd irm gotzhavs dacz dem Slag(2) ze fvedrung vnd den prvedern da selbst durch meiner sel hail vnd saelichait gegeben vnd geschaft han dreizzig phunt Passawer phening avf meinem weingarten pei Zebing am Haelenstain(3), den ich gechauft han vmb mein phening also beschaidenlich, ob ich in di selben phening pei mir lebentigen nicht engaeb, swie ich denn veruar mit gescheft oder an geschaeft, so sol daz vorgenant gotzhavs vnd die pruder dez selben weingarten sich vnderwinden vnd inne haben mit allem nvtz ze einen rechten satz, di weil di vorgenant dreizzig phunt pfening in nicht gaenzleichn gegeben werden von dem, swem ich in schaff oder swem er gevall, vnd daz daz dem goczhaus stat vnd vnzebrochen beleib. Dez sint gezevg mein lieber vater Ott(4) von Chrotendorf vnd mein prvder Stephan(5), Dietel avz der Aw(6), her Vlrich(7) der propst, Niclos(8) der preiol, Ditreich(9), Chunrat(10) der subprior vom Slag, vnd ander piderb levt. Darveber gib ich in auch den verinsigelten prief(11) mit meinem jnsigel. Der ist gegeben, do von Christes geburd waren tavsent jar, drevhundert jar, in dem viertzehenten jar, dez eritags nach Phingsten."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 90, S. 106-107