Ich Hainrich der Ro^eselhoffer mein hawsfraw und mitsampt uns all unser paider eriben wier tu^en kunt, daz wir haben ze chauffen geben recht und redlich der ersamen weysen und unser lieben vrowen vrowen Katherinen ze den zeiten abatissinn zu Slyrwach und den convent daselbs die nu da sint oder noch chu^enftich werdent, unser gut ze Haslach gelegen in Chirichdorffer pharr ob dem selben chloster datz Slyerwach und haben inz geben umb ein gelt dez sey uns gar und gaentzlich gericht und gewert habent, und daz selb gut ist unser rehtz lechen gewesen von unserm genedigen herren hern Ewerhart von Wallse, und habent daz selb gut zu dem selben chloster geben mit allen den eren rechten und nu^etzzen und darzu^e geho^ert ze holtz und ze velt versu^echt oder unversu^echt swie daz genant ist, und antwu^erten inz auz unser nutzz und gewer in ir nutzz und in ir gewer in allem dem recht als wirz inngehabpt haben mit der beschaidenhait, daz wir fu^erwaz chain ansprach nach dem selben gut niht mer haben schu^ellen weder mit recht noch an recht. Wir schu^ellen auch dez selben gntz ir gewer sein an aller der stat, und in des not und du^erft geschicht und auch als chawfs und gewerschaft recht ist in dem land ob der Ens. Daz daz unser lieben vrowen vrowen Katherinen abatissin zu Slyrwach und dem convent doselbs daz also staet gantz und unverchert beleib, so loben wir in mit unsern trewen und geben in daru^eber den offen brief versygelten mit unserm anhangenden insygel, und zu einer pezzer sicherhait der warhait mit unsers lieben pru^eder Gotschalichs von Hanvelt anhangenden insygel und mit dez erberen mans Hermons dez Prawnspergers zu den zeiten lantrichter zu Slyrwach und mit dez erberen Hainreichs dez Prawnspergers versygelten mit ir paider anhangenden insygel. Und daz ist geschehen do man zalt von Christi gepu^ert drewtzehen hundert jar darnach in dem syben und sechtzikosten jar dez nechsten freytags vor dem sunnwent tag,

Source Fulltext: OÖUB 8 (Wien 1883) S. 324f., Nr. 332