Wir hainrich von gottes genaden herczog in Osterreich vnd jn Steir veriehen vnd thun kundt offenlich an disem brieff allen den, die in an sehent oder horen lesen., Daz wir durch vnser sel hail geschafft haben vnserer frawen zu Mawrkirchen in dem weilhart zwainczick Mutte traids vnd zehen dreiling weins vnd haben die gelobt zu geben oder so vil pfenning wiener Moncz, als sich da fur geziehen mag, dem Techant, der der nw^e zu Mawrkirchen kapplan ist, auff den nachsten zwelften tag, der nwn schierst ku^enfftig ist. Ta^eten wir des nicht, so haben wir dem vorgenanten Kapplan von Mawrkirchen vnuerschaidenlich zu burgen geben vnserm Oheim Graffen Albrecht von halse, der sol im gebunden sein vnd verrichten sol an allen aufschub auff den selben tag, als wir es da vor gelobt haben, dem wir auch geloben an disem brieff, was schaden jn do von an gien mag, den sullen wir im ga^enczlich ablegen, wir wellen auch, das der offt vorgenant kapplan von Mawrkirchen vns uerschreib vnder des Bischoffs jnsigel von pawssaw (sic) vnd seinem jnsigel, das er das selbe getraid vnd den wein anleg an ewig gult der Kirchen zu Mawrkirchen vnd mit der gult, wenn wir nicht ensein, sol man vnsern jartag vnd aller vnser pruder ymmer ewicklich mit vigilien, mit kerczen, mit lowtenden gloken vnd mit gesungner mess begen an sand Michahels obent. vnd das es stat vnd vnzerbrochen von vns beleib, Besigel wir disen brieff mit vnserm jnsigel. Der ist geben, do man zalt von gottes geburdt drewzehenhundert jar vnd Newnzehen jar an dem nachsten Erchtag nach sand Ruprechts tag.

Source Fulltext: OÖUB 5 (Wien 1868) S. 250, Nr. 257