Dem erwurdign und geistlichn herren herren Johannsen, abbt zw Lambach meinem genadigen herren, enpeutt ich Valentin zw Hofing und Magdalena sein hausfraw, und Hanns Magswoll schuester zw Obelczhaim unser unttertanig gehorsam willig dinst. Genadiger herr, wir fuegen ewern genaden zw wissen, das wier kaufflich zw ewiger fuerzicht und statem kauff zw kauffen geben haben all unserr gleichew eribschafft und gerechtichaitt, so wier haben an dem guett zw Rosswandt in Gebalczkircher pharr und Stahrnberger landt gericht gelegen, dem Niclas dy zeytt zw Rosswandt gesessen, und Margretten seyner hausfrawen und Sigmundt und Barbara und Kathrey und Margretten, des egemeltten Niclas zw Rosswandt hawsfrawen eeliche kinder umb ein summ gelcz, der wier schon an allen schaden zw rechten tagen an alle widerredt pezaltt sindt. Auff das, genadiger herr, pitt wir egemeltte Valentin zw Hoffing und mein hausfraw und Hanns Magsswoll mit diemuetingen vleyss, so dy zw ewern genaden komen, ewer genad wel in ein genuegsamen kauffbrieff daruber verfertigen, und so das ewer genad gethan hatt, dan so gelob und versprechen wier ewern genaden in ewer genad insigell nichcz zw reden, sunder vleyssigklich fur an zw verdien. Des zw eyner waren urkundt schick wier ewern gnaden den offen pettbrieff, verpetschafft mit der erberen und weysen Kolman Alttnhofferr und Hannsen Offenlueger auff gedruckten pettschafften, in und iren eriben an schaden. Zeugen der sach und pet umb dy petschafft sind dy erberen Lienhartt Sneider zw Gebalczkirchen und Wollffgang zw Hoffing und Lienhartt Widbmerr zw Obernhaim und ander frummer leitt genueg, der geben ist nach Cristi gepurdt tausentt vierhundertt und darnach in dem vierundaczigisten jarr an sandt Larenczen tag des heyligen marttrerr.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 107-109, Nr. 3094