Wir Johanns von Gots genaden abbt zw Lambach bekennen mit dem prieff, das fur unns komen sein Hanns Awer, unnser hindersass und purger zw Lambach und Elspet sein hawsfraw, und haben mit wolbedachtem muet und guetem willen recht und redlichen verkawfft und zw kawffen geben ir haws mit aller seiner rechtlichen zuegehorung gelegen in unnserm markcht und purkchtfrid zw Lambach zwischen des Snaitinger und des Wolfganngen Zotl weber hewser und haben das zw kawffen geben Andre dem Sneyder, purger zw Melkch, seiner hausfrawn Anna und allen iren paidn eribm umb ain sum gellts, der sew von in ganntz und gar ausgericht und betzallt sein zw rechten tagen an allen abganng und schadn. Allso haben wir in dem yetz genannten Andre, seiner hawsfrawn Anna und iren paidn eribm das vorbenant haws mit aller seiner rechtlichen zuegehorung bestat und verlichen, was wir in rechtlichen daran bestaten und verleichen sullen od mugen, doch das sew unns und unnserm gotshaws alle jar jarlichen zu sand Joringtag in unser oblay davon raichen und dien sullen zwelyff schilling Wienner pfennig. Es sein auch der vorbenant Hanns Awer und Elspet sein hawsfraw des obbenantn hawss mit aller seiner rechtlichen zuegehorung fur sich und all ir eribm des vorbenantn Andre, seiner hawsfrawn Anna und irer paider eribn recht gewern und furstandt fur alle rechtlichew ansprach, wo und wan in des nott und durfft beschiecht mit dem rechtn, alls dan solhs kawffs und lanndes ob der Enns recht ist. Wir offen und meltn auch, das sew kainerlay wanndlung damit nicht haben sullen in kainerlay weis an unnser handt und gueten willen, und sullen unns auch alles das davon leyden und dulden, das ander unnser hindersassen und lewt gesessen in unnserm markcht und purkchfrid zw Lambach gein unns leydent und duldent unverczigen unnsers gotshaws rechtn in allen sachen. Zw urkund geben wir in des also den offen prieff, besigelt mit unnserm anhanngundn insigl. Der prieff ist geben nach Krissty gepurde viertzehenhundert jare und darnach im newnundsybmtzigkissten jare am pfincztag sand Kathreintag der heyligen junkchfrawn.