Wir Johanns von Gots genadn abbt zw Lambach bekennen mit dem prieff, das fur unns komen ist Mertt Huebmer zw Weispach und hat mit wolbedachtem muet und guetem willen rechtt und redlichen vermachtt und geben seiner elichen hawsfrawn Magdalena viertzehen pfundt pfennig lanndeswerung zw rechter freyer marigengab nach dem lanndesrechtn ob der Enns, und vermacht ir die auff aller seiner eribschafft und gerechttigkait, so er hat an der halbm huebm zw Weispach in Pennywanger pfarr gelegen, und ist eribrecht von unns und unnserm gotshaws und all sein varundew hab geleich halbe. Allso haben wir ir der vorgenantn Magdalena und iren eribm die vorgenantn viertzehen pfundt pfening ir marigengab awff der vorgenantn eribschafft und gerechttigkaytt an und awff der benantn halbm huebm mit irer zuegehorung bestatt und verlichen, was wir in rechttlichen daran bestatten und verleichen sullen oder mugen, doch das man unns und unnserm gotshaws alle jar jarlichen davon raichen und dien soll nach innhallt, lawtt und sag des allten eribprieffs, so darumben awsganngen ist und unnsers gotshawss urbarpuech. Es ist auch der obbenant Mert fur sich und all sein eribm der obbenantn seiner hawsfrawn Magdalena und irer eribm der vorbenantn viertzehen pfundt pfening irer marigengab und der varundn hab halber awff der obbenantn halbm huebm ir rechtter gewer und furstandt fur alle rechttlichew ansprach, wo und wan ir des nott und durfft beschiechtt mit dem rechttn, alls dan solhs gemachts, marigengab und lanndes ob der Enns rechtt ist. Wer auch nachsster erib ist nach des vorgenantn Merttn tod und abganng, der hat alle jar jarlichen losung von der obbenantn Magdalena oder iren eribm albeg zw unnser lieben frawntag der liechtmess viertzehen tag vor oder viertzehen tag hinnach umb die obbenantn viertzehen pfundt pfening und nicht umb mer. Wir offen auch, das sy kainerlay wandlung damit nicht haben sullen in kainerlay weys an unnser handt und gueten willen, und sullen unns auch alles das davon leyden und dulden, das ander unnsers gotzshawss eribler und hindersassen gein unns leydent und duldent unvertzigen unnsers gotshaws rechten in allen sachen. Zw urkund geben wir ir des allso den offen prieff, besigelt mit unnserm anhanngundn insigl. Geben alls man zallt nach Kristii gepurde viertzehenhundert jare und darnach im newnundsybmtzigkissten jare am mantag vor gotsleichnambstag.