Alexander Dei et apostolice sedis gracia episcopus Forliniensis sanctissimi domini nostri pape referendarius et in Germania cum clausula et in quibuscunque aliis locis ad que te declinare contingerit in spiritualibus et temporalibus cum plena potestate legati de latere nuntius et oratore etc. venerabilibus in Christo nobis dilectis abbati et conventui monasterii sancti Kyliani in Lambach ordinis sancti Benedicti Pataviensis diocesis salutem in Domino sempiternam. Benigno sunt illa vobis concedenda favore, quibus mediantibus consciencie pacem et animarum salutem serenius consequi valeatis et votive, hinc est, quod nos vestris devotis inclinati supplicationibus, ut confessor ydoneus secularis vel cuiuscunque ordinis regularis fuerit, quem elegendum duxeritis et quisque vestrum duxerit ab omnibus et singulis peccatis, criminibus, excessibus et delictis per vos conmissis, et si talia forent propter que sedes apostolica merito foret consulenda nec non a quibuscunque penis et censuris ecclesiasticis, si quas forsan comuniter vel divisum incurreritis et irregularitatis macula semel in vita et in mortis articulo plenarie vos absolvere valeat, in aliis vero casibus sedi apostolice non reservatis totiens quotiens fuerit oportunum debitam vobis et cuilibet vestrum absolutionem impendat devotioni vestre tenore presentium auctoritate legationis nostre et qua in hac parte specialiter fungimur, concedimus et indulgemus, iniuncta tamen pro modo culpe penitentia salutari, quodque per annum postque presentes nostre litere ad vestram deverint notitiam singulis sextis feriis ieiunare teneamini, et si forsan voto in illa regula dictis diebus ieiunio adstricti essetis, sequenti die ieiunare teneamini. Si tamen quod absit super huiusmodi remissionis gratia aliqua conmiseritis vel aliquis vestrum conmiserit quo ad illa presens nostra remissio nullius roboris vel momenti existat, insuper si alicui fuerit satisfactio impendenda, illam per vos si supervixeritis, si vero decesseritis per heredes vestros facere teneamini, et quisque vestrum teneatur, in contrarium facientibus quibuscunque non obstantibus. In quorum omnium et singulorum fidem et testimonium premissorum presentes nostras literas exinde fieri fecimus et sigilli nostri consueti iussimus appensione communiri. Datum in opido Steyr Pataviensis diocesis, anno Domini millesimo quadringentesimo septuagesimo septimo indictione decima, die vero septima decima mensis octobris, pontificatus sanctissimi in Christo patris et domini nostri domini Sixti divina providentia pape quarti anno eiusdem septimo.