Alexander Dei et apostolice sedis gracia episcopus Forliniensis sanctissimi domini nostri pape referendarius in Germanis cum clausula et in quibuscunque aliis locis ad que te declinare contigerit in spiritualibus et temporalibus cum plena potestate legati de latere nuntius et orator venerabili in Christo nobis dilecto abbati Lambacensi Pataviensis diocesis salutem in Domino sempiternam. Justis supplicum votis libenter amnuimus eaque favoribus prosequimur oportunis exhibita siquidem nobis nuper pro parte dilecti nobis in Christo Wolfgangi Stegmar laici dicte diocesis petitio continebat, quod cum de anno elapso quondam Leonardus Stegmar eius germanus adulterium quandam Agnetem Conradi liberam congnoscendo commisisset, dictus Leonardus in humanis agens in festo pasce proxime sequentis suo plebano in Gospolczhofen eiusdem diocesis confessus est, qui sibi eucaristie sacramentum propterea denegavit, et ut eadem petitio subiungebat decurso quodam temporis spatio prefatus Leonardus ad mortis usque vicissitudinem vulneratus fuit et cum in huiusmodi extremitate laboraret a dicto suo plebano in confessione auditus et a dicto adulterio perpetrato et omnibus aliis suis peccatis absolutus extitit, eucaristie quoque sacramentum devote suscepit, quo suscepto mox diem suum obiit et licet ipse qunondam Leonardus precepta ecclesie in mortis articulo observaverit et cordis conpunctionem ostenderit, nichilominus predictus plebanus incerto loco profano eius cadaver preter et adversus voluntatem et humiles ac instantes preces et requisitionem dicti Wolfgangi sepelliri iussit et mandavit, prout adhuc ibidem humatum existit, quare pro parte dicti Wolfgangi nobis fuit humiliter supplicatum, quathenus ei super premissis de oportuno iuris subsidio providere dignaremur. Nos itaque huiusmodi supplicationibus inclinati auctoritate legationes nostre et qua in hac parte fungimur circumspectioni tue per hec scripta conmittimus et mandamus, quatenus vocatis vocandis de premissis te diligenter informes, et si ita fuisse et esse ut prefertur reperiveris et aliud non obistat canonicum inpedimentum eadem auctoritate dictum Leonhardum defuntum de profano loco exhumari et in sancta terra sepelliri facere quam citius procures, contradictores quoslibet per censuram ecclesiasticam appelatione postposita compescendo non obstantibus constitutionibus, ordinationibus statutis quam synodalibus et aliis in permissis contrarium forsan facientibus quibuscunque. In quorum omnium et singulorum fidem et testimonium premissorum presentes nostras literas exinde fieri fecimus et sigilli nostri consueti iussimus appensione communiri. Datum in opido Gmunden dicte diocesis, anno Domini millesimo quadringentesimo septuagesimo septimo, indictione decima, die vero ultima mensis novembris pontificatus sanctissimi in Christo patris domini nostri domini Sixti divina providentia pape quarti anno eiusdem septimo.