Wir Johanns von Gotts genaden abbt zw Lambach bekennen mit dem brief, das fur uns komen ist Liennhartt Mullner untterm Perg und patt uns mit diemuetigem vleiss, das wir im sein lebtag und nicht lennger ze freystifft liessen das Tollerguett ze Mullparcz mit seiner zuegehorung gelegen in Swannser pharr, das dann uns, unserm goczhaus geben und geschafft ist von Hannsen Tollter burger Lynncz umb ainen jartag zw volbringen. Also haben wir dem obgenantten Liennhartten Mullnar sein lebtag und nicht lennger das obgenant Tollterguetel ze Mullparcz mit seiner rechtleichenn zuegehorung zw rechter freystifft gelichen und lassenn, doch das er uns und unserm goczhaus alle jar jerlichenn davon raichen und dann soll zw unser lieben frawntag der dinstzeit zway pfundt und funff Wienner pfenning, und soll uns das auch stifftlich und peylich hallten und legen und damit uns und unserm goczhaus damit trew gehorsam und gewarttig sein, auch alles das davon leiden und dullden, alls ander unser freystiffter und von solhem freysaczigen urbarguet gepurdt angevar unverczigen unsers goczhaws rechten in allen sachenn. Zw urkundt geben wir im des also den offenn brief, besigellten mit unserm anhanngunden innsigl. Geben alls man zallt nach Cristi gepurdt vierczehennhundert jar und darnach im sybennundsybennczigisten jar an mitichenn vor mittervasstenn.