Albertus Dei et apostolice sedis gratia episcopus Salonensis ac reverendissimi in Christo patris et domini domni Udalrici eadem gracia episcopi Pataviensis in pontificalibus cooperator, universis et singulis christifidelibus presentes nostras literas inspecturis, visuris pariter et ligi audituris, salutem in Domino sempiternam. Splendor paterne glorie, qui sua mundum illuminat ineffabili claritate pia vota fidelium de ipsius clementissima maiestate sperancium tunc precipue benigno favore proseguitur cum devota ipsorum humilitas sanctorum precibus et meritus adiuvatur. Cupientes igitur, ut cappella sancte Elizabeth in monasterio Lambacenci ordinis sancti Benedicti Pataviensis diocesis situata congruis frequentetur honoribus ac fideles Christi eo libentius devocionis causa confluant ad eandem seque uberioris dono gracie sentiant esse refectos. Nos de omnipotentis Dei misericordia ac beatorum Petri et Pauli apostolorum eius auctoritate confisi omnibus et singulis vere penitentibus et confessis, qui in predicta cappella convenerint missasque ibi legerint vel audierint sive manus adiutrices porrexerint cum cera, candelis, libris, calicibus quibusve aliis rebus ad cultum divinum spectantibus, si qua devote obtulerint tociens quotiens qualibet vice quadraginta dies criminalium et octoginta venialium peccatorum de iniunctis sibi penitenciis misericorditer in Domino relaxamus, futuris, perpetuis temporibus duraturis. In quorum fidem et testimonium presentes literas fieri nostrique sigilli pontificalis iussimus et fecimus appensione communiri. Datum in monasterio predicto Lambacensi die veneris penultima mensis augusti anno domini millesimoquadringentesimoseptuagesimosexto.