Reverendo in Christo venerabilibus ac religiosis viris patribus et dominis domino Johanni Dei gracia abbati, Wolfgango priori totique conventui monasterii sancti Kyliani in Lambaco, ordinis sancti Benedicti Pataviensis dyocesis, Leonardus divina permissione prepositus, Hainricus decanus totusque conventus monasterii sancti Nicolai extra muros Patavienses ordinis sancti Augustini episcopi canonicorum regularium eiusdem dyocesis sincere caritatis affectum et eternam adipisci salutem in eo qui est omnium salus. Quia mediante caritate, que vinculum perfeccionis ab apostolo predicatur, membra singula in corpore sancte ecclesie sibi invicem coniunguntur et Christo suo capiti ad percipiendum per ipsum et in ipso graciarum spiritualium influenciam uniuntur, tanto liberius sinum caritatis in ampliande confraternitatis et consorcium in alios dilatantur quanto ad participationem fructus huiusmodi ardencius anhelamus, ad eos autem precipue qui nobis quadam spiritualiter propinquitatis propagine coniunguntur. Cum enim reverendissimi in Christo patres ac domini beate memorie dominus Adalbero Herbipolensis vestri et dominus Altmannus Pataviensis episcopi nostri monasteriorum fundatores et patres nostri eterna veneracione dignissimi, dum presentes adhuc spirarent auras societate ac amicitia singulari ut quodam presagium in eorum legendis demonstrat caritate intima fuerunt confederati. Nos eorum filii utinam digni monasteriorum ipsorum professores et alumpni merito pro Dei honore eorundem fundatorum et patrem nostrorum vestigiis inherendo exemplaque tam salutaria sequendo speciali caritate et fraternitate connecti debemus atque coniungi. Quapropter racionibus huiusmodi et vestrarum paternitatum fama ac religiositate permoti matura deliberacione prehabita, plene confraternitatis consorcium videlicet communionem omnium bonorum in missis, oracionibus, elemosinis, abstinenciis, disciplinis, vigiliis, ieiuniis et aliis virtutum exerciciis, que divina clemencia per presentes nos et successores nostros dignabitur operari vobis ac successoribus vestris libere concedimus adicientes nichilominus, quod, cum obitus unius aut plurium ex vobis nobis intimatus fierut, vigilias et missam defunctorum decantandem iuxta consuetudinem nostri monasterii persolvemus, sed et singuli sacerdotes missas legentes singulas missas, clerici vero missas non legentes officium defunctorum totum, vesperas scilicet et vigilias novem leccionum cum laudibus, conversi quoque centum Pater noster et totidem Ave Maria in remedium anime eiusdem seu animarum earundem dicent, nomina quoque defunctorum vestrorum vero prefato monasterio incorporatorum dilgenter in libris nostris seu kathalogo mortuorum annotare curabimus, prout nobis vicissim tenebimini. Datum in nostro monasterio sancti Nicolai extra muros Patavie octava mensis januarii anno Domini millesimoquadringentesimoseptuagesimosexto.