Wir Johanns von Gotts genaden abbt zw Lambach bekennen mit dem brief, das fur uns komen ist Zesarius Ardinger, burger zw Wells, und patt uns mit diemuetigem vleiss, das wir im und allen seinn erben ain pewnntten unter dem Wagrain neben des Augustin Ardinger pewntn gelegen in Wellser pharr, die dann erbrecht ist von uns und unserm goczhaus, geruechten zw bestatten und zw verleichenn, wann er die von seinem enn Paullen Ardinger saligen ererbt und zuegefallen sey. Also haben wir dem obgenantten Zesarius Ardinger und allen seinn erben die obgenanten pewnntten mit irer rechtleichen zuegehorung ze rechtem erbrecht bestatt und verlichenn, was wir in rechtleichen daran bestatten unnd verleichen sullen oder mugen, doch das man uns und unserm goczhaus alle jar jarlichenn davon raichenn und dienn soll zw unnser lieben frawntag der dinstzeit zehenn Wienner pfenning. Wir offenn auch, das sew kainerlay wanndlung damit nicht haben sullen in kainerlay weiss an unser hannt und gueten willen, und sullen uns auch alles davon leiden unnd dulden, das ander unsers goczhaus erbler gein uns leidennt und dulldent unverczigenn unsers goczhaus rechten in allen sachenn. Zw urkund geben wir im des also den offenn brief, besigellten mit unserm anhanngunden innsigl. Geben als man zalt nach Cristi gepurd vierczehennhundert jar und darnach im sechsundsybemzigisten jar an monnttag vor sannd Jorigentag des heyling ritter und martrer.