Ich Conrat Holczler huebmaister in Osterreich empewt allen unsers allergnedigsten herrn N. des Romischen kaisers etc. ambtleiten, die da mautt und aufslag auf der Thuenaw innemen, mein dinst bevor, und lass ew wissen, das mir die ersamen geistlichen herren des gotshaws zw Lambach von ierer gewondlichen anczall weins wegen des gegenwurttigen jars genuegsame purgschaft tun haben lassen in der mainung, wenn sein kaiserlich gnad ungeverlich zw lannde kome, das sy ew als denn von seinen kaiserlichen genaden iner vier wochn darnach komend ain geschaft brief auswringen und ew den antburten wellen lassen. Tatten sy aber des nicht, das sy als denn die mautt und den aufslag davon geben, das schreibt also auf, sy haben auch den anslag der heiratstewrer ausgericht und emphil ich ew darauf von einer kaiserlichen gnaden wegen den selbigen geistlichn herren zu Lambach ir gewondliche anczall weins des gegenwurtigen jars mautfrei und aufslagfrey allenthalben ungeirt furfuern lasset und tuet darinn kain anders nicht. Geben zw Wien an freitag Kolomani anno Domini lxxvo.