Wir Johanns von Gots gnaden abbt zw Lambach bekennen mit dem brief, das fur uns komen ist Hanns Plachenmullner von Sigkenfurt und hat mit wolbedachtem muet und guetem willen recht und redlichen verkauft ain pewnntten mit irer zuegehorung, gelegen zenagst dem Siechhoff in Wellser pfarr und erbrecht ist von uns und unserm goczhaus, des wir anweist sein mit briefleicher urkund ausganngen von unserm vorsedl abbt Thoman saliger gedachtnuss, und hat die zw kauffen geben Wallthesarn Sanntos burger zw Wells und allen sein erben umb am summa gelcz, der sew ganncz und gar ausgericht und bezalt warden sein zw rechten tagen an allen schaden. Also haben wir im dem ieczgenanten Wallthesarn und allen sein erben die obgemelt pewntt mitsambt aller irer zuegehorung zw rechtem kauff bestatt und verlichen, was wir in rechtleichen daran bestatten und verleichen sullen oder mugen, doch das man uns und unserm goczhaus alle jar jarlichen davon raichen und dienn sol zw unser lieben frawntag der dinstczeit sechczehen Wienner pfennig. Es ist auch der obgenant Hanns Plahenmullner und all sein erben der gemeltn pewntn mit irer zuegehorung des benantn Walthesarn und aller seiner erben recht gewern und furstant fur alle rechtleichew ansprach, wo und wann in des nott und durfft beschiecht mit dem rechten, als dann solichs kauffs und lanndes ob der Enns recht ist angevar. Wir offenn auch, das sew kainerlay wanndlung damit nicht haben sullen in kainerlay weiss an unnser hannt und gueten willen, und sullen uns auch alles davon leiden und dullden mit stewr und in andern wegen, als ander unsers goczhaus erbler angevar unverczigen unnsers goczhaus rechten in allen sachen. Zw urkund geben wir in des also den offenn brief, besigelt mit unserm anhangunden innsigel, der geben ist nach Cristi gepurd vierczehenhundert jar und darnach im vierundsibenczigisten jar an freytag nach sannd Veytstag des heyligen ritter.