Wir Thoman von Gots gnaden abbt ze Lambach bekennen mit dem brief allermenikleichen, den er furkumbt zu sechen, horn oder zu lesen, als Wolfganng an dem Alramspeng seiner hausfrawn Magdalena, des Kylian am Petenegk tochtter und allen iren erben halbs gut am Alramsperg vermacht hat innhalt desselben gemachttbriefs darumb auch von uns ausganngen, hat der benant Wolfganng seiner vorberurten hausfrawn all seine vorunde hab gleich halbe auch vermachtt, das ist dann uberdacht, das dy vorund hab vorgemeltt nicht in den vordern gemachttbrief geschriben und villewcht nicht angesagtt und angegeben worden ist, wie dem allem, so bestetigen wir noch der obenanten Magdalena solhe vorberurte hab gleich halbew in kraft des briefs, was wir ir rechtleichen davon bestetten und verleichen sullen oder mugen, also so der bemeltt Wolfganng vor seiner bemeltten hausfrawn mit tod ee abget, als dann so sol und mag sy mit solher halber vorunden hab allen iren nutz und frumen damit betrachtten, gehanndeln und tun, verschaffen und geben, wem sy wil an widersprechen, irrung und hinndernuss des obgenanten Wolfganngen erben und menikleichs von iren wegen getreuleich und ungeverleichen. Mit urkund des briefs, den wir in also darumben geben, besigelt mit unnserm aufgedrukchttem secret, doch uns, unnserm gotshaus und nachkomenn an unnserm dienst, rechten und vordrungen in allen sachen unvergriffenleich und an schaden. Geben als man zalt nach Kristi geburde in dem vierczechenhundertundainsundsibennczigisten jare an sambstag nagst nach sannd Erasemtag des heiligen bischolve in der quottember.