Wir Thoman von Gottes gnaden abbt ze Lambach bekennen mit dem brief, das fur uns komen sinnd Barbara, Hannsen de Swartzmulner seligen witib, und mitsambt ir ir aydem Mertt Ponar anstat irer tochtter seiner hausfrawn Elsbethen, und habent mit wolbedachtem mut und gutem willen recht und redleichen verkaufft das gut genant der Waitzenlaib gelegen in Welser pharr mit aller seiner zugehorung, das eribrecht ist von uns und unnserm gotshaus, des wir vormallen unnderweist worden sein mit briefleicher urkund ausganngen von unnserm vorsedel abbt Jacoben seliger gedachtnuss und von unnserm conventt, und habent ze kauffen gegeben Mertten an der Aw, seiner hausfraun auch genant Elsbeth und irn baiden erben umb ain sum geltz, der sew gantz und gar ausgerichtt und beczalt worden sinnd zu rechtten tagen an allen schaden. Also haben wir in den yetz benanten dem Mertten an der Aw, seiner hausfrawn und iren baiden erben das vorberurt gut mit aller seiner zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol zu unnser lieben frawntag der dienstzeit dreyundfunffczigk Wienner phenning, ze weinachtten zwaintzigk pfenning und zway huener. Es sinnd auch die obgemeltten Barbara und ir aydem Mertt Ponar anstat seiner hausfrawn Elsbethen und irer aller eriben des obgenanten gutz mit aller seiner zugehorung des bemeltten Mertten an der Aw, seiner hausfrawn auch genant Elsbeth und irer baider erben rechtt gwern und furstandt fur all rechtleichew ansprach, wo und wann in des not und durft beschiecht mit dem rechten, als dann solhs kauffs und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weis an unnser hanndt und gutem willen, und sullen uns auch alles das davon leyden und dulden, das annder unnser und unnsers gotshauss erbler gein uns leydent und duldent unverczigen unnsers gotshauss rechten in allen sachen. Mit urkund des briefs, den wir in also darumb geben, besigelt mit unnserm anhanngundem insigel. Geben als man zalt nach Kri[sti geb]urde in dem vierczechenhundertundainsundsibennczigisten jare an suntag nach Jacobi apostoli.