Venerabilibus ac religiosis in Christo patribus et fratribus domino Thome abbati, Johanni priori totique conventu monasterii Lambacensis, ordinis sancti Benedicti, Pataviensis diocesis. Nos fratres Wolfgangus abbas, Chunradus prepositus totusque conventus monasterii sancti Mauricii inferioris Althe ordinis et diocesis eorundem cum sincere caritatis affectu salutem in Domino perhenniter adipisci. Quia mediante caritate que vinculum perfeccionis ab apostolo predicatur membra singula in corpore sancte ecclesie sibi invicem coniunguntur et Christo suo capiti ad percipiendum per ipsum et in ipso graciarum spiritualium influenciam uniuntur tanto liberius atque libencius sinum caritatis in ampliande confraternitatis consorcium dilatemus quanto ad participacionem fructus huiusmodi anhelamus, unde vestrarum caritatum laudabili conversacione ac religiositate moti matura deliberacione prehabita plene confraternitatis bonorum scilicet omne consorcium et communionem in missis, oracionibus, elemosinis, abstinenciis et vigiliis ac aliis virtutum exerciciis, que divina clemencia per presentes nos et successores nostros in dicto nostro monasterio dignabitur operari vobis et successoribus vestris tenore presencium libere concedimus adicientes nichilominus, quod cum obitus fratris unius aut plurium predicti monasterii vestri professi vel professorum nobis intimatus fuerit, vigilias et missam defunctorum iuxta consuetudinem nostri monasterii persolvemus, sed et singuli sacerdotes missas legentes singulas missas, clerici vero missas non legentes officium defunctorum totum vesperas scilicet et vigilias ix leccionum cum laudibus, conversi quoque centum pater noster cum totidem ave Maria in remedium animarum eorundem dicent. In quorum omnium testimonium et robur hanc paginam sigillis nostris munitam vobis tradere decrevimus. Datum in prefato nostro monasterio in octava apostolorum Petri et Pauli anno ab incarnacione Domini millesimo quadringentesimo septuagesimo primo.