Wir Thoman von Gots gnaden abbt ze Lambach bekennen mit dem brief, das fur uns komen ist Nikel, Thomann auf dem Niderngut ze Wielthing weylandt daselbs gesessen seligen sun und hat mit wolbedachtem mit und gutem willen recht und redleichen verkaufft all sein erbschaft und gerechtikait, die er gehabt hat an dem benanten gut ze Wielthing gelegen in Geboltskircher pharr und erbrecht ist von uns und unnserm gotshaus, und hat die ze kauffen gegeben seinn lieben geswistreden Jorigen, Kathrein, Magdalena und allen iren erben umb ain suma gelts, der er gantz und gar ausgerichtt und beczalt worden ist zu rechtten tagen an allen schaden. Also haben wir in den yetz vorberurten dreyen geswistreden Jorigen, Kathrein, Magdalena und allen iren erben allen irs brueder Nikleins erbschaft und gerechtikait, so er an dem obgenanten gut zusambt irer erbschaft, die sew auch daran habent, bestett und verlichen, was wir in rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol nach lautt und innhaltung unnsers gotshauss urbarpuch. Es ist auch der obgemeltt Nikel und all sein erber aller seiner erbschaft und gerechtikait, so er an dem obenanten gut gehabt hat, des oberurten Jorigen baider seiner swestern Kathrein, Magdalena und irer aller dreyer erben recht gwern und furstandt fur all rechtleichew ansprach, wo und wann in des not und durft beschiecht mit dem rechten, als dann solhs kawffs und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weis an unnser handt und gutem willen, und sullen uns auch alles das davon leyden und dulden, daz annder unnsers gotshauss erbler gein uns leydent und duldent unverczigen unnsers gotshauss rechten in allen sachen. Mit urkund des briefs, den wir in also darumb geben, besigeltem mit unnsern anhanngundem insigel. Geben als man zalt nach Christi geburde in dem vierczechenhundert und in dem ainsundsibennczigistem jare an sambstag vor sannd Bartlmestag des heiligen zwelfpotn.