Wir Thoman von Gots gnaden abbt ze Lambach bekenn mit dem brief, als wir den hof, genant der Sumpperhof, mit aller seiner zugehorung ob Wels gelegen in der pharr daselbs kaufft haben von Ludweigen und Hannsen gebruedern den Hawnolten innhalt des briefs, so wir von in darumben haben, und der dann unnser und unnsers gotshauss dienstperigs urbargut gewesen ist, haben wir nun mit wissen unnsers convents und mitbruder den gemeltten hof mit den dreyn veldern, mit allen irn zugehorungen, als dy mit zawn umb und umb umbfangen sein alle bey und obeinannder gelegen und darzu nichtz mer, verlichen haben zu ainem rechtten erbrecht hindangesatzt und ausgenomen das wismad, so vor zu dem gemeltten hof gehort hat, und haben den also verlichen maister Mertten Tischler genant der Aichperger, seiner hausfrawn Kathrein und irn baiden erben solicher maynung und beschaiden, das sew uns und unnserm gotshaus all jar jarleichen davon raichen und dienn sulln zu unnser lieben frawntag der dienstzeit vier phundt Wienner phening. Beschach aber des nicht und uns den gemeltten dienst zu den benanten tag und sunnder darnach in dreyn vierczechen tagen nicht geben, alsdann so hat sich ir erb[recht und] gerechtikait auf dem berurten hof mit den dreyn veldern und aller irr zugehorung in unnser und [unnsers gotsha]uss gwalt widerumben ledigkleichen vervalln angever. Sy sulln uns auch den obgemeltten mit [den dreyn veldern] stiftleich und pewleichen legen und halten ze hof, ze veld, auch ain behausung da[rauf setzen als] zu ainem hof gehort auch damit trew gehorsam und gwerttig sein, als annder unnser und unnsers [gotshaus erb]ler und alles das geen uns leyden und dulden, das annder unnser und unnsers gotshauss erbler gein uns [leydent] und duldent. Und ob auch sach wer oder wurd, das sew ir erbrecht und gerechtikeit auf dem benanten hof der dreyen velder mit irn zugehorungen verkauffen wollen oder museten, das sulln sew uns oder nachkomen vor an notten und zu kauffen geben fur menikleichen. Wolten wir aber von in nicht kauffen, so mugen sew es ainem anndern, doch ainem mit unnserm wissen und willen, der uns oder unnsern nachkomenn fugsam und gevekleichen sei unverczigen unnsers gotshauss rechten in allen sachen. Mit urkund des briefs, den wir in also darumben geben, besigelt mit unnserm anhanngunden insigel. Geben als man zalt nach Kristi geburde in dem vierzechenhunndertundains und sibennczigisten jare an mitichen nach sannd Kunigenden tag in der ersten vastwochen.