Wir Thoman von Gots gnaden abbt ze Lembach bekennen mit dem brief, das fur uns komen ist Wolfganng Prodler anstat sein, seins bruder Jacoben burger zu Waidhoven und annde[r s]einer mit[er]ben, was der sein, die Mertten weylandt unnsers hofsmidts seligen gut ererbt mitsambt im haben [... u]nd der [g]walt er hat und im den vor unnser gegeben habent, und hat also mit wolbedachtem mut und gutem willen recht redleichen verkaufft ain halbs jeuch und ainen halben tail an ainem halben jeuch acher gelegen in Trawnveld hie in unnserm purkchfrid zwischen Paulem unnsers hofsmidts und der Vorsterinn vor dem wald akchern, und hat dy ze kauffen gegehen Fridreichen yetz unnserm nachrichtter, seiner hausfrawn Kathrein und irn baiden erben umb ain sum gelts, der er gantz und gar ausgerichtt und beczalt worden ist zu rechtem tagen an allen schaden. Also haben wir im dem yetz benanten Fridreichen, seiner hausfrawn und irn baiden erben das obgemeltt halb jeuch und ain halben tail an ainem halben jeuch akcher mit aller zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns und unnserm gotshaus allew jar jarleichen davon raichen und dienn sol zu der zeit nach lautt unnsers gotshauss urbarpuch. Es ist auch der obgemeltt Wolfganng Prodler und sein bruder, ir miterben und irer aller erben sunnder der vorberurt Prodler anstat sein und irer aller rechtt gwern und furstandt fur all rechtleichew ansprach des gemeltten Fridreichen, seiner benanten hausfrawn und irer baider erben, wo und wann in des not und durft beschiecht mit dem rechten, als dann solhs kauffs und lanndes ob der Enns recht ist. Wir offen auch, das sy kainerlaye wanndlung damit nicht haben sullen in kainerlay weis an unnser handt und gutem willen, und sullen uns auch alles das davon leyden und dulden, das annder unnsers gotshauss lewt hie in unnserm markcht und purkchfrid gesessen gein uns leydent und duldent unverczigen unnsers gotshauss rechten in allen sachen. Mit urkund des briefs, den wir in also darumb geben, besigelt mit unnserm anhanngundem insigel. Geben als man zalt nach Kristi geburde in dem vierczechenhunndertundsibennczigisten jare an phintztag nach sannd Jorigentag.