Philippus miseratione divina tituli sancti Laurentii in Lucina presbyter cardinalis, dilecto in Christo fratri Thome, abbati monasterii sancti Lamperti in Lambach ordinis sancti Benedicti Pataviensis diocesis, salutem in Domino. Solet annuere sedes apostolica piis votis et honestis petentium precibus maxime, ubi salus requiritur animarum, favorem benivolum impartiri. Cum igitur ex parte tua nobis fuerit humiliter supplicatum, ut in anime tue solatium eligendi confessorem ydoneum tibi licentiam concedere dignaremur, nos tuis supplicationibus favorabiliter annuentes auctoritate domini pape, cuius penitentiarie curam gerimus, et de eius speciali mandato super hoc vive vocis oraculo nobis facto, devotioni tue concedimus, quatenus liceat tibi ydoneum et discretum presbyterum in confessorem eligere, qui super peccatis, que sibi confiteberis, nisi talia sint, propter que merito sit sedes predicta consulenda, tibi auctoritate predicta provideat de absolutionis debite benefitio et penitentia salutari, quandiu vixeris, quotiens fuerit oportunum. Vota vero peregrinationis et abstinentie, si qua emisisti, que commode servare non potes, ultramarino, beatorum Petri et Pauli atque Jacobi apostolorum votis duntaxat exceptis, commutet tibi idem confessor in alia opera pietatis. Dat. Rome apud sanctum Marcum sub sigillo officii penitentiarie, iii kalendas Junii, pontificatus domini Pauli pape ii anno quarto.