Venerabilibus ac religiosis in Christo patribus domno Thome abbati totique conventui monasterii Lambacensis ordinis sancti Benedicti, Pataviensis dyocesis, nos fratres Laurencius abbas, Leonardus prior totusque conventus monasterii Celle Marie ordinis et dyocesis eorundem cum sincere caritatis affectu salutem in Domino perhenniter adipisci. Quia mediante caritate, que vinculum perfeccionis ab apostolo predicatur membra singula in corpore ecclesie sibi invicem coniunguntur et Christo suo capiti ad percipiendam per ipsum et in ipso graciarum spiritualium influenciam uniuntur tanto liberius atque libencius sinum caritatis in ampliande confraternitatis consorcium dilatamus quanto ad participacionem fructus huiusmodi fervencius anhelamus, unde vestrarum caritatum affectu et religiositate moti matura deliberacione prehabita plene fraternitatis bonorum scilicet omnium consortium et communionem in missis, oracionibus, elemosinis, abstinenciis et vigiliis ac aliis virtutum exerciciis, que divina clemencia per presentes nos et sucessores nostros in dicto monasterio Celle Marie dignabitur operari vobis ac successoribus vestris fraternitatem concedimus et presencium tenore roboramus adicientes, quod cum obitus unius vel plurium predicti monasterii vestri professi vel professorum nobis nuciatus fuerit, vigilias et missam defunctorum iuxta consuetudinem nostri monasterii persolvemus, sed et sing[uli] sacerdotes missas legentes singulas missas, clerici vero missas non legentes officium defunctorum totum vesperas scilicet et vigil[ia]s novem leccionum cum laudibus, conversi quoque centum pater noster cum totidem ave Maria in remedium animarum eorundem dic[unt]. In quorum omnium testimonium et robur hanc paginam sigillis nostris munitam prefatis fratribus nostris tradere decrevi[mus]. Datum anno Domini millesimo quadringentesimo sexagesimo quinto septima die mensis ianuarii.