Nos Sigismundus Dei gracia et apostolice sedis gracia episcopus Salonensis, cooperator in pontificalibus ecclesie Pataviensis unversis Christi fidelibus Deum sincero corde colentibus presentes literas inspecturis salutem in eo, qui est omnium vivorum et mortuorum vera salus. Quia pro modulo nostro fidelium mentes unius effici voluntatis et ad cultum divinum ex cordis affectu per pie devocionis opera christifideles allicere cupientes, quoniam ut ait apostolus, omnes stabimus ante tribunal Christi iudicis nostri recepturi pro ut gessimus in corpore sive bonum sive malum fuerit, oportet igitur nos diem messionis sive mansionis extreme misericordie operibus prevenire ac eternorum intuitu seminare in terris, quod Domino dante multiplicato fructu recolligere valeamus in celis firmam spem fiduciamque tenentes, quoniam qui parce seminat parce metet et qui bene seminat de benediccionibus metet vitam eternam. Unde de consensu, voluntate speciali singularique commissione reverendissimi in Christo patris ac domini nostri graciosi domini Udalrici episcopi Pataviensis dignissimi gracia sancti spiritus nobis specialiter suffragante ea diligencia et devocione, qua potuimus chorum unacum altari summo ac principali monasterii Lambacensis in honore sanctissime ac gloriose virginis Marie et sancti Kiliane martiris et episcopi de novo rite ac decenter consecravimus in die conceptionis eiusdem gloriose virginis Marie, que fuit octava die mensis decembris ad instanciam venerabilis in Christo patris domini Thome abbatis totusque conventus eiusdem monasterii Lambacensis consencientes. Dedicationem vero prefati chori et eiusdem altaris consecratorum statuimus a cunctis christifidelibus die concepcionis beate virginis Marie perpetue devoteque venerari. Igitur omnibus vere penitentibus confessis et contritis, qui ad preductum chorum seu eiusdem altare in prefato monasterio Lambacensi devote cum tribus oracionibus dominicalibus et totidem angelicis salutationibus et uno symbulo apostolorum convenerint seu adierint, missasque legerint vel audierint sive manus adiutrices porrexerint cum cera, libris, candelis, ornamentis, calicibus quibusve aliis rebus ad cultum divinum eiusdem altaris honorifice spectantibus in omnibus festivitatibus infrascriptis videlicet Nativitatis, Circumcisionis, Epiphanie, Resurreccionis, Ascensionis Domini nostri Jesu Christi, in festo Penthecostes, Corporis Christi et per octavas eiusdem, dominica Corporis atque in omnibus festivitatibus sanctissime Dei genitricis virginis Marie et per octavas assumpcionis et visitacionis eiusdem virginis Marie et omnibus diebus dominicis, sancti Michaelis archangeli et omnium angelorum et sanctorum Dei Petri et Pauli et omnium apostolorum, sancti Stephani prothomartiris, Sigismundi, Laurencii martirum, Nicolai, Martini episcoporum, Jeronimi presbyteri, Katherine et Petronelle virginum, in festo dedicacionis prefati chori et altaris et patronorum devote in Domino visitaverint de omnipotentis Dei misericordia et beatorum Petri et Pauli eorundem auctoritatibus confisi semper quadraginta dies criminalium et octaginta venialium et iniunctis sibi penitenciis in Domino misericorditer tenore presencium relaxamus. Datum et actum loco et temporibus supra notatis anno Domini millesi¬ mo quadringentesimo sexagesimo quarto harum testimonio literarum sub appensione nostri sigilli et munimire roboratarum.