Wir Thoman von Gottes genaden abbt ze Lambach bekennen mit dem brief, das fur uns komen ist Peter Motschier, burger zu Wels, und hat mit wolbedachtem mut und gutem willen recht und redleichen gemachtt und geben seinem lieben aydem Erasm dem Stainprugker zu seiner tochtter Margrethen und vormallen Stephann des Pawngartner seligen und yetz des benanten Stainpruker eeleiche hausfraw hunndert phundt pfenning munss diezeit gib und geb im landt ob der Enns zu rechttem heyratgut nach des vorberurten lanndesrechten, und hat im dy auszaigtt auf ainem sechstail auf den hernach benanten stukchen und gutern und aller irer zugehorung, von erst auf ainer wisen, genant die Kuetterin, und auf ainer selden, da weylandt Kristan auf der Hayd aufgesessen ist, und auf ainer wisen, dy darzu gehort, genant dy Grundtwisen und ainer wisen genant dy Veldhaimerin, und auf ainer wisen, genant der Lus. Also haben wir im dem obgenanten Erasem Stainprugker das gemeltt sein gemachtt auf den oberurten stukchen und gutern zu rechttem heiratgut bestett und verlichen, was wir im rechtleichen daran bestetten und verleichen sulln oder mugen, doch daz man uns und unnserm gotshaus all jar jarleichen davon raichen und dienn sol nach innhaltung des brief, so uber dy obenanten stukch gantz sind lautt und sag. Es ist auch der obgemeltt Motschier und all sein erben des obgenanten gemachts, heiratgutz auf dem oberurten sechsteil mit aller seiner zugehorung des bemeltten Erasem Stainprugker rechtt gwern und furstandt fur all rechtleiche ansprach, wo und wann im des not und durft beschiecht mit dem rechten, als dann solhs gemachts heyratgutz und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unnser handt und gutem willen, und sullen uns auch alles daz davon leyden und dulden mit stewr an widerred, als annder unnsers gotshauss erbler gein uns leydent und duldent unverzigen unnsers gotshaus rechten in allen sachen. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem vierczechenhundertunddreynundsechczigisten jare an montag vor Cecilie virginis.