Wir Thoman von Gottes genaden abbt ze Lambach bekennen mit dem brief, das fur uns komen sinnd Jacob Zeidelhueber und sein hausfraw Angnes und habent mit wolbedachtem mut und gutem willen recht und redleichen verkaufft das gut im Rat in der Lederaw, gelegen in Vorchdorffer pharr, das erbrecht ist von uns und unnserm gotshaus, und habent das ze kauffen gegeben irem lieben bruder und gesweyn Steffan Zeidelhuber, seiner hausfrawn, auch genant Angnes, und iren baiden erben umb ain sum geltz, der sew gantz und gar ausgerichtt und beczalt worden sind zu rechtten tagen an allen schaden. Also haben wir im, dem yetz benanten dem Steffann, sein hausfrawn Angnesen und iren baiden erben das obgenant gut mit aller zugehorung bestett und verlichen, was wir in rechtleichen daran bestetten und verleichen sulln oder mugen, doch das man uns und unnserm gotshaus all jar jarleichen davon raichen und dienn sol nach innhaltung unnsers gotshauss urbarpuch lautt und sag. Es sind auch dy obgemeltten Jacob Zeidelhueber, sein hausfraw Angnes und irer baider eriben des obenanten gutz mit aller seiner zugehorung des berurten Steffann Zeidelhueber, seiner hausfrawn, auch genant Angnes, und irer baider erben recht gwern und furstandt fur all rechtleiche ansprach, wo und wann in des not und durft beschiecht mit dem rechten, als dann solhs kauffs und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unnser handt und gutem willen, und sullen uns auch alles das davon leyden und dulden, daz annder unnsers gotshauss erbler gein uns leydent und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngunden insigel. Geben als man zalt nach Kristi geburde in dem vierczechenhunndertundzwaynundsechczigisten jaren an mantag nagst vor sannd Braxedistag der heiligen junkchfrawn.