Reverendis et religiosis in Christo patri et domno domno Thome Dei gratia abbati monasterii Lambacensis priori et ceteris fratribus eiusdem omnibus presentibus et futuris Pataviensis dyocesis frater Petrus Wellen ordinis fratrum predicatorum, sacre theologie professor ac prior provincialis provincie Theutonice salutem et affluenciam spiritualium bonorum. Exigente vestre pie devotionis affectu, quem ad nostrum habetis ordinem specialiter exhibicione piarum elemosinarum vestrarum in nostro conventu Cremensi manifestius apparet, vobis concedo per presentes participacionem in omnibus bonis spiritualibus videlicet missis orationibus predicationibus, ieiuniis, abstinentiis, vigiliis, laboribus ceterisque huiusmodi, que per fratres et sorores in dicta provincia fieri dederit auctor omnium bonorum Iesus Christus in vita pariter et in morte volens, quod anime prelatorum presidentium et fratrum vestrorum monasterii fideliter in capitulis nostris provincialibus per fratres nostros Chremenses recommendentur orationibus fratrum nostrorum, ut pro eis debita suffragia fiant. In cuius concessionis testimonium sigillum mei officii provincialatus presentibus est appensum. Datum in Chrembs anno Domini millesimo quadringentesimo sexagesimo die nona mensis aprilis.