Wir Thoman von Gottes genaden abbt ze Lambach bekennen mit dem brief, das fur uns komen ist Ulreich Hardegker und hat mit wolbedachtem mut und gutem willen recht und redleichen verkaufft den Abersee mit aller zugehorung gelegen in unnserm purkchfrid am Stadel seinem vettern Wolfganng dem Hardegker, burger am Lauffen, seiner hausfrawn Kristina und allen seinn erben umb ain sum geltz, der er gantz und gar ausgerichtt und beczalt worden sind zu rechtten tagen an allen schaden. Also haben wir im dem obgenanten Wolfganng, seiner hausfraw Kristina und allen seinn erben den obgemeltten Abersee mit aller zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns und unserm gotshaus all jar jarleichen davon raichen und dienn sol zu sannd Michelstag zechen Wienner phening. Es ist auch der obgemelt Ulreich und all sein erben des obenanten Abersee mit aller zugehorung des berurten Wolfganng Hardegker und seiner hausfrawn Kristina und aller seiner erben rechtt gwern und furstandt fur all rechtleichew ansprach, wo und wann in des not und durft beschiecht mit dem rechten, als dann soleichs kauffs und lanndes ob der Enns recht ist. Wir offen auch, das sy kainerlaye wanndlung damit nicht haben sullen in kainerlay weis an unnser handt und gutem willen, und sulln uns auch alles das davon leyden und dulden, das annder unnsers gotshauss lewt gesessen in unnserm purkchfrid am Stadel gein uns leydent und duldent unverczigen unnsers gotshauss rechtten in allen sachen. Ze urckund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem vierczechenhunndertund newnundfunffczigisten jaren an phintztag an sannd Potencianatag der heiligen junkchfrawn.